O Concello de Santiago aprobou este xoves múltiples actuacións urbanísticas e administrativas durante a súa Xunta de Goberno Local, nunha sesión que tamén estivo marcada polo recoñecemento de importantes avances xudiciais e pola resolución de cuestións patrimoniais de calado.
Entre os principais acordos, destaca a concesión de licenzas para obras en distintos puntos da cidade. A máis relevante é a reparación da cuberta do edificio do Colexio San Clemente, sede do ‘Instituto Rosalía de Castro’, promovida pola Consellería de Educación cun orzamento de execución de máis de 482.000 euros e un prazo estimado de catro meses. Tamén se aprobaron proxectos de construción e rehabilitación en Santa Marta, Guadalupe de Zasete, Rocha Vella, General Pardiñas e demoliciones en Rosalía de Castro e Mestre Mateo.
No eido urbanístico, salientan tamén os tres expedientes de contratación aprobados. O primeiro está vinculado ás obras de urbanización exterior da Plataforma Loxística de Intercambio de Mercadorías, por un importe superior aos 629.000 euros, en cumprimento do Plan Especial de Infraestruturas aprobado en 2023. O proxecto inclúe a creación dunha nova glorieta, ampliación da calzada, beirarrúas integradas coa senda peonil do Tambre á Gracia e renovación de servizos como saneamento, electricidade e telecomunicacións.
As outras dúas licitacións son para o fornecemento de combustible ao parque móbil municipal (cun importe máximo de 270.926 euros por dous anos) e para a compra e instalación de 44 ordenadores para centros socioculturais rurais, cun investimento de máis de 27.000 euros financiado pola Deputación.
A Xunta tamén acordou prorrogar o alugueiro do local da Corredoira das Fraguas 37, sede da Asociación Veciñal Axuntanza, por un ano máis ata xuño de 2026, cun custo anual próximo aos 10.000 euros. Tamén se aprobou a revisión e nova licitación das obras no polideportivo do CEIP Pío XII, tras quedar deserto o primeiro concurso; o novo orzamento base ascende a 99.494 euros IVE incluído.
No apartado social, foron aprobadas axudas nominativas por valor de máis de 78.000 euros a entidades como Saúde Mental FEAFES, AGADEA, Fonte de Abirxe ou a Asociación Galega de Asperger, para o desenvolvemento de programas de atención, respiro familiar e orientación.
Un dos puntos máis destacados da sesión foi a confirmación da sentenza favorable do Tribunal Supremo na reclamación das dúas esculturas románicas atribuídas ao Mestre Mateo, pertencentes ao Pórtico Exterior da Catedral. O fallo recoñece a propiedade do Concello sobre estas pezas, actualmente en mans da familia Franco, e ordena a súa restitución. A sentenza non é firme, pero non admite recurso ordinario, supoñendo un fito histórico tanto pola súa carga simbólica como pola relevancia xurídica da estratexia impulsada pola Asesoría Xurídica Municipal. A alcaldesa fixo público o recoñecemento ao labor de Xaquín Monteagudo e Manuel Cutrín, impulsores da vía legal emprendida en 2017.
Tamén se deu conta dunha segunda sentenza favorable ao Concello fronte ao recurso do Colexio Oficial de Aparelladores, que impugnaba as instrucións técnicas municipais sobre proxectos en ámbitos protexidos. O Tribunal validou as directrices do Servizo de Licenzas ao considerar que non regulan competencias profesionais nin innovan o ordenamento xurídico, senón que se limitan a interpretar normas vixentes.
Finalmente, o goberno local anunciou a súa participación como parte interesada nun procedemento contencioso relacionado cunha vivenda de uso turístico na rúa Entre Muros, anulada pola Axencia de Turismo de Galicia, e avanzou que a localización definitiva das esculturas recuperadas será estudada co apoio dun grupo de expertos e buscando un espazo visible e visitable que honre o seu valor artístico e histórico.
