O presidente do Partido Popular de Santiago, Borja Verea, continúa coas visitas aos distintos barrios e parroquias da cidade co obxectivo de recoller demandas veciñais e visibilizar o que cualifica como un “abandono” por parte do goberno local. Esta semana foi a quenda do barrio de Guadalupe, onde estivo acompañado polos concelleiros Olaya Otero e Adrián Villa e membros da asociación veciñal, que lle trasladaron preocupacións relacionadas coa accesibilidade, a seguridade viaria ou o estado do espazo público.
Durante a visita, Verea afirmou que “é evidente o desleixo do goberno nacionalista”, ao tempo que denunciou “a deterioración xeneralizada das rúas e a falla de investimentos comprometidos que nunca se executan”. Entre os exemplos sinalados polo líder popular destacan a ausencia de beirarrúas en zonas céntricas ou a falta de prazas de aparcamento, cuestións que, segundo el, deberían estar resoltas nunha cidade como Santiago.
O portavoz do PP compostelán apuntou tamén que “non se pode gobernar dándolle as costas á xente nin ignorando as súas necesidades máis básicas”, e advertiu que esta situación está a xerar un “malestar veciñal xeralizado”. A súa formación, asegurou, continuará percorrendo os barrios para recoller inquedanzas e “ofrecer alternativas realistas e efectivas”.
Entre os puntos sinalados por Verea durante as súas intervencións figuran tamén os barrios de Vidán, Meixonfrío, Fontiñas ou Avenida de Barcelona, onde, segundo o PP, hai beirarrúas rotas, problemas de mantemento e insuficiencia nos servizos de limpeza. Esta diagnose compleméntase cunha crítica ao modelo de xestión actual, que cualificou de “tripartito sen rumbo” e ao que responsabiliza do que define como “paralización preocupante”.
O deputado autonómico concluíu preguntándose “ata onde pode chegar o desleixo do actual goberno local”, e advertiu da “necesidade dun cambio de rumbo” na xestión municipal para evitar, segundo o seu criterio, que barrios como Guadalupe continúen a sufrir un “proceso de degradación progresiva”.
