A compostelá Lara Castro Taboada, estudante do último curso do grao en Educación Infantil na Universidade de Santiago de Compostela (USC), vén de recibir a bolsa Santander Excelencia 360º, unha distinción que recoñece tanto os méritos académicos como a implicación cultural e social do alumnado universitario.
A bolsa, dotada con 12.000 euros, forma parte dun convenio entre a USC e a Fundación Banco Santander, que busca fomentar o rendemento académico e a participación activa na vida universitaria. A concesión foi avaliada por unha Comisión de selección que destacou o “extraordinario estudiantado” da universidade e a súa contribución ao desenvolvemento da sociedade galega. Nese sentido, consideraron que perfís como o de Lara Castro “auguran un bo futuro para o país”.
A galardoada expresou a súa satisfacción destacando que este recoñecemento “é froito de moito traballo e esforzo, pero tamén de pasalo ben e de gozar probando cousas novas”. Alén do seu expediente académico, a comisión valorou especialmente o seu interese pola cultura e o compromiso social, así como a súa vontade de innovar dentro do campo educativo.
Un dos aspectos que máis peso tivo na súa candidatura foi a súa formación e interese pola música, un eido que considera inseparable da súa identidade. “A educación musical forma parte da miña vida”, explicou Lara, quen manifesta a vontade de integrar a música no proceso educativo como ferramenta de aprendizaxe, expresión e inclusión na etapa infantil.
A USC salientou que a bolsa é un exemplo do seu compromiso por recoñecer o talento e fomentar proxectos transformadores liderados polo seu alumnado. O caso de Lara Castro representa, segundo a institución, a combinación entre excelencia académica e vocación pedagóxica, con perspectiva de futuro e impacto positivo no ámbito educativo.
