As obras de mellora no cruzamento entre as rúas Xeneral Pardiñas e República do Salvador, en Santiago de Compostela, concluiron segundo o calendario previsto. A partir das 14:00 de mañá, venres, quedarán habilitados os pasos peonís, permitindo así a circulación a pé pola zona. Pola súa banda, o tráfico rodado seguirá restrinxido de forma temporal para asegurar a consolidación do novo formigón, tal como estaba contemplado dende o comezo da intervención.
A actuación iniciouse o pasado 5 de maio e supuxo reorganizacións no servizo de autobuses urbanos e no tráfico xeral. A execución foi adxudicada á Unión Temporal de Empresas (UTE) formada por Arines Obras y Proyectos SL e Success Infraestructuras y Servicios SA, cun orzamento de 61.352,59 euros.
A intervención forma parte dun plan de mellora da mobilidade peonil e calmado do tráfico impulsado polo Concello, seguindo criterios xa aplicados noutros puntos da cidade, como no cruzamento con Montero Ríos. Segundo fontes municipais, o obxectivo é avanzar cara a unha cidade máis accesible e sustentable, na que se prioricen os desprazamentos a pé e se recupere o espazo público para a cidadanía.
O proxecto incluíu a elevación da plataforma de cruzamento ao nivel das beirarrúas, co fin de eliminar barreiras arquitectónicas e facilitar os itinerarios peonís. Este deseño busca tamén fomentar unha condución máis prudente, ao crear unha sensación de entrada nun espazo reservado ás persoas. Xunto con esta modificación, realizáronse tamén traballos no alumeado público, reaxuste da sinalización viaria, drenaxe, mobiliario urbano e elementos de xardinaría.
