Estudantes, docentes e investigadores da USC mobilizaranse mañá diante do Parlamento de Galicia para reclamar á Xunta a continuidade do Máster en Matemáticas, ameazado de desaparición pola falta de alumnado suficiente segundo os criterios oficiais. A concentración, convocada pola Plataforma en Defensa do Mestrado en Matemáticas da USC, comezará ás 09:30 e coincide coa sesión plenaria na que BNG e PSdeG formularán preguntas ao conselleiro de Educación, Román Rodríguez, sobre este asunto.
A principal reivindicación do colectivo é que a Xunta modifique a súa postura e permita manter o máster, malia non cumprir cos mínimos de matrícula establecidos. O decreto vixente desde 2011 fixa que os másteres universitarios non interuniversitarios deben contar con 20 estudantes, un número que, tras unha flexibilización normativa, se reduciu a unha media de 16 alumnos nos últimos tres cursos. Porén, o máster de Matemáticas na USC só chegou a acadar unha media de 12 matriculados, o que podería motivar a súa desaparición.
A alternativa que permitiría a continuidade do título é a declaración de ‘singularidade’, unha figura que exime certos estudos de cumprir os requisitos cuantitativos cando existen razóns académicas, científicas ou sociais que xustifican a súa preservación. A USC solicitou esta consideración durante varios anos, pero a Xunta negoua en cada ocasión, a última vez mediante unha resolución do 30 de abril de 2025.
A Plataforma que impulsa a protesta considera que a negativa da Administración autonómica compromete a formación avanzada en matemáticas e prexudica o desenvolvemento científico e profesional neste eido. Por iso, pide un xiro na política educativa do goberno galego que permita garantir unha oferta académica pública de calidade tamén en disciplinas con menor demanda. A protesta conta co apoio de numerosos membros da comunidade universitaria e pretende visibilizar o impacto negativo dunha decisión que, advirten, podería sentar un precedente para outros estudos de posgrao.
