O Concello de Santiago vén de estrear un novo Servizo de Mediación Intercultural Comunitaria, unha iniciativa da Unidade de Atención ás Persoas Migrantes (UAMI) coa que se busca facilitar a convivencia e o diálogo entre a veciñanza e a crecente poboación migrante da cidade. A presentación do proxecto tivo lugar nunha rolda de prensa encabezada pola concelleira María Rozas, acompañada por Mari Fidalgo, mediadora encargada do servizo, e Miguel Fernández, da Plataforma polo Emprego do Foro Galego de Inmigración.
Segundo explicou Rozas, o servizo nace como unha experiencia piloto que se desenvolverá ata finais de outubro e pretende dar resposta a unha demanda histórica do tecido asociativo vinculado á migración. A mediadora Mari Fidalgo —persoa con 22 anos de traxectoria no activismo migrante en Compostela— será a encargada de liderar esta nova etapa desde unha perspectiva comunitaria, antirracista e feminista interseccional.
O proxecto busca acompañar as persoas migrantes no seu proceso de asentamento na cidade, facilitar a comunicación con institucións e veciñanza e combater os discursos de odio. A propia Rozas alertou de que no ano 2023 se rexistraron no Estado máis de 850 delitos de odio por racismo e xenofobia, unha cifra que, segundo sinalou, representa só a punta do iceberg.
O servizo prestará atención de luns a venres en diferentes espazos municipais. Os luns e mércores estará dispoñible de 16:00 a 20:00 na sede da UAMI, situada no edificio do CERSIA en Salgueiriños. Os martes e xoves, de 10:00 a 14:00, funcionará no Centro Sociocultural do Ensanche, e os venres, de 08:00 a 15:30, na Casa Comunitaria de O Outeiro das Cancelas.
A mediación irá dirixida tanto á poboación de orixe estranxeira como a profesionais e entidades sociais, educativas ou sanitarias que traballen co colectivo migrante. Mari Fidalgo subliñou que a intervención terá un enfoque integral, incorporando o acompañamento psicosocial, xa que “migrar tamén afecta á saúde mental”. Reivindicou tamén a necesidade de “enraizar” e non só “integrar”, apostando por unha sociedade cohesionada e respectuosa coa diversidade.
Desde o Foro Galego de Inmigración, Miguel Fernández lembrou que esta función de mediación xa se viña realizando desde hai tempo de forma voluntaria e autoxestionada polo movemento asociativo, e instou o Concello a consolidar o servizo no futuro con máis recursos e persoal especializado. Asemade, puxo como exemplo situacións cotiás que poden resultar complexas para unha persoa migrante, como obter un certificado de empadroamento ou orientarse nos procedementos administrativos.
O servizo comezou xa a súa actividade esta semana e pode ser contactado por calquera persoa interesada a través do correo electrónico ou teléfono facilitado pola UAMI. María Rozas agradeceu a longa traxectoria do Foro de Inmigración e destacou que Santiago é e debe seguir sendo unha cidade de acollida, tamén grazas ao traballo silencioso do terceiro sector.
