A formación política Unión de Cidadáns Independentes (UCIN) vén de anunciar o nomeamento de Diego Adrián Mallo como coordinador da súa agrupación en Santiago de Compostela, nun paso que marca o seu inicio formal como organización política na cidade.
UCIN preséntase como unha nova alternativa local, afastada das estruturas dos partidos tradicionais e cunha aposta firme pola independencia política, a proximidade veciñal e o coñecemento directo da realidade compostelá. Segundo explican nun comunicado, trátase dun proxecto integrado por persoas que viven e coñecen a cidade, os seus barrios e o seu rural, e que aspiran a canalizar “traballo serio”, “diálogo aberto” e unha “defensa activa da cidadanía”.
A organización define a súa proposta como plural e centrada nas persoas, rexeitando “promesas baleiras” e apostando pola “construción conxunta dunha cidade mellor”. Cun discurso que apela á responsabilidade política e á escolla consciente dunha maneira diferente de facer política, UCIN busca abrirse paso como unha forza que prioriza as necesidades reais da veciñanza fronte a intereses alleos ao ámbito local.
A chegada de UCIN á capital galega coincide cun contexto de fragmentación política e crecente demanda de alternativas que se sitúen fóra do espectro partidario clásico. Neste sentido, a designación de Mallo como coordinador en Santiago constitúe un primeiro paso na implantación do partido a nivel municipal, co obxectivo de constituírse nun interlocutor activo nas demandas da cidadanía.
