O actual secretario xeral do PSOE compostelán, Aitor Bouza, confirmou este xoves a través das súas redes sociais que se presenta para seguir liderando a formación na capital galega. Nun vídeo difundido nas súas redes sociais, Aitor Bouza destaca que nestes meses a formación “recuperou a forza da militancia” e abriuse á cidade.
“Agora toca seguir, contigo, construíndo o futuro que Santiago merece“, indica o dirixente socialista, que asegura que o PSOE na cidade estivo “a defender” os dereitos do veciños pero subliña que “aínda queda moito por facer”. E é que, conforme sostén, “a cidade está parada, a vivenda é inasumible para os mozos e as súas familias, os barrios están esquecidos e os servizos públicos saturados”. “Santiago non necesita unha alcaldesa que só venda fume, necesita futuro”, indica.
Aitor Bouza foi elixido en outubro de 2023 como novo secretario xeral do PSOE compostelán, tomou o mando tras unha etapa na que unha xestora se fixo cargo do a agrupación local tras a derrota nas urnas do alcalde Xosé Sánchez Bugallo. Durante o seu período á fronte do partido tivo lugar crise no grupo municipal, que derivou na expulsión de catro concelleiros (Mila Castro, Mercedes Rosón, Gonzalo Muíños e Marta Álvarez) por desatender as liñas marcadas pola a dirección. Con iso, os socialistas pasaron a ter só dous edís na capital galega (Gumersindo Guinarte e Marta Aval).
Bouza, próximo ao líder do PSdeG José Ramón Gómez Besteiro, é tamén membro da executiva galega do Partido Socialista, na que ocupa a secretaría de Acción Territorial e Formación.
ASEMBLEA LOCAL, O SÁBADO
Polo momento, Aitor Bouza é o único socialista da capital galega que deu un paso adiante para disputar a Secretaría Xeral do PSOE local. O prazo para que os aspirantes poidan presentar as súas candidaturas finaliza o venres ás 11,00 horas e a asemblea local terá lugar o sábado, día 7 de xuño.
