A Asociación de Cardioloxía Intervencionista da Sociedade Española de Cardioloxía (ACI-SEC) aproveitará o seu encontro anual, que terá lugar de 4 ao 6 de xuño no Auditorio de Galicia, para reclamar que se culmine a creación da subespecialidade médica. Tal e como trasladou a entidade nunha nota de prensa, a cita reunirá durante o congreso a máis de mil expertos de toda España no diagnóstico e tratamento percutáneo da enfermidade cardiovascular.
Neste contexto, a presidencia da Asociación de Cardioloxía Intervencionista, a doutora Belén Cid, explicou que a cardioloxía intervencionista “é unha subespecialidade médica que diagnostica e trata enfermidades cardiovasculares de forma minimamente invasiva” a través de “procedementos percutáneos”.
A asociación apuntou así mesmo que “para adquirir os coñecementos e as habilidades técnicas necesarias para conseguir unha asistencia de calidade, requírese unha formación complementaria e específica adicional, por un período de dous anos, á xa ofrecida durante a especialización en cardiología”.
Así mesmo, o presidente da SEC (Sociedade Española de Cardioloxía), o doutor Luís Rodríguez Padial, engadiu que desde a entidade consideran “fundamental que a formación dos especialistas se basee en criterios rigorosos e regulados” e confía en que se “implementen proximamente, consolidando un modelo formativo de calidade”.
