O Concello de Santiago de Compostela iniciará esta semana a licitación do novo contrato do servizo de transporte público urbano, un proceso que marcará un cambio estrutural na xestión deste servizo ao optar por un contrato de servizos en lugar do tradicional modelo de concesión. Así o anunciaron a alcaldesa, Goretti Sanmartín, e o concelleiro de Mobilidade, Xan Duro, nunha rolda de prensa celebrada para dar conta do estado do expediente.
Segundo explicou Sanmartín, esta decisión responde á vontade de reforzar o carácter público do transporte, asegurando a súa calidade e accesibilidade. “Queremos que o transporte deixe de ser un negocio e pase a ser plenamente un servizo público”, afirmou, destacando que este cambio permitirá ao Concello deseñar e adaptar o servizo en función das necesidades da cidade, sen depender dos intereses dunha empresa concesionaria.
A modificación do modelo evita tamén a obriga de remitir a documentación á Oficina Nacional de Avaliación (ONE), o que axiliza o procedemento. A alcaldesa subliñou que esta decisión se adoptou tras unha análise detallada de resolucións xudiciais e informes técnicos doutros municipios, que evidenciaron dificultades recorrentes na xustificación do risco empresarial esixido nas concesións.
O novo contrato terá unha duración prevista de 13 anos e contará cun orzamento base de 137 millóns de euros, dos que o Concello achegará arredor de 8 millóns anuais. Esta achega directa é esencial, segundo indicou Duro, para manter tarifas accesibles e evitar que o custo do servizo recaia na cidadanía. O prezo do billete ordinario sen bonificación pasará dun euro a 1,40 euros, pero o bono máis utilizado, empregado por máis da metade dos usuarios, manterase en 0,63 euros, cunha subvención municipal que complementa as achegas estatais.
Entre as melloras previstas inclúese a renovación completa da flota de autobuses, que chegará a 67 vehículos novos, así como a creación de novas liñas e frecuencias ampliadas, tanto no ámbito urbano como no rural, e a incorporación de servizos nocturnos, inexistentes até agora. A empresa adxudicataria disporá de tres meses para adaptar a flota existente e dun prazo máximo dun ano para completala con vehículos novos que cumpran os requisitos de accesibilidade, información e sistemas de pago.
O concelleiro defendeu que este modelo permitirá unha maior capacidade de vixilancia, control e adaptación, e destacou que a xestión mediante contrato de servizos facilitará modificacións nas liñas e horarios sen restricións derivadas de intereses empresariais. “Nunha cidade dinámica como Compostela, isto é fundamental”, sinalou.
Desde o goberno local amósanse convencidos de que, malia tratarse dun proceso complexo, será posible adxudicar o novo contrato dentro do actual mandato municipal. “Levamos meses traballando de forma intensa e coordinada cos distintos departamentos municipais”, asegurou Sanmartín, que sinalou este contrato como “un dos grandes retos do goberno”.
O proceso arrinca agora coa tramitación administrativa interna, que inclúe a emisión dos informes preceptivos por parte de contratación, intervención e asesoría xurídica. Unha vez completado ese paso, o expediente será aprobado en Xunta de Goberno e publicado na plataforma de contratación pública.
Co cambio de modelo e as melloras anunciadas, o Concello aposta por un transporte máis flexible, público e adaptado aos retos da mobilidade sostible na capital galega.
