O auditorio da Casa da Cultura do Milladoiro, en Ames, converterase o vindeiro mércores, 4 de xuño, nun espazo de análise e reflexión sobre as comunidades enerxéticas, coa celebración dunha xornada aberta organizada pola Oficina de Transformación Comunitaria (OTC) deste concello. A actividade está dirixida tanto a profesionais como a cidadanía interesada, e contará coa presenza de representantes da Deputación da Coruña, do Instituto Enerxético de Galicia (INEGA), da FEGAMP, do IDAE e de diversas entidades locais e académicas.
A xornada comezará ás 9.30 horas coa recepción institucional, a cargo do presidente da Deputación, Valentín González Formoso, e do alcalde de Ames, Blas García. A continuación desenvolveranse tres bloques temáticos que abordarán desde os retos xurídicos ata as posibilidades de financiamento das comunidades enerxéticas.
O primeiro bloque, que se desenvolverá entre as 10.00 e as 11.00 horas, estará centrado nas implicacións legais da constitución destas comunidades. Moderado por Hugo Sánchez, responsable da área xurídica da OTC de Ames, contará coa participación de Marcial Rodríguez Toajas (interventor da Deputación da Coruña), Adrián J. Márquez Caramés (secretario do Concello de Betanzos) e Carlos Amoedo Souto, catedrático de Dereito Administrativo da Universidade da Coruña.
O segundo bloque, titulado Ames en transición, desenvolverase entre as 11:30 e as 13:00 horas. Presentará a experiencia da OTC de Ames, unha das cinco oficinas galegas que conseguiron financiamento estatal do IDAE. A mesa estará moderada por Iván Andrade, director técnico de Energal e da propia OTC. Intervirán o concelleiro de Medio Rural, Javier Antelo Seoane, así como representantes de comunidades enerxéticas xa en funcionamento, como Xerando (Ernesto Ares Yáñez), Arousa en Transición (Ramón Rodríguez Rodríguez) e Buchabade (Antonio Fernando Malvar Cortizo).
Finalmente, o terceiro bloque, previsto entre as 13.00 e as 14.00 horas, abordará o papel das administracións públicas no impulso deste modelo. Moderará o xornalista Pedro Tasende Cancela e participarán Javier Domínguez González, director de Enerxía do INEGA, María Lamela, técnica de Fondos Europeos da FEGAMP, e un representante do Instituto para a Diversificación e Aforro da Enerxía (IDAE).
A xornada enmárcase nas actividades de difusión e acompañamento da OTC de Ames, unha oficina con presenza física e virtual, que asesora tanto á veciñanza como a colectivos interesados en poñer en marcha proxectos colectivos de produción e consumo enerxético renovable.
As persoas interesadas en asistir deben realizar inscrición previa, dispoñible a través da web municipal.
