O Concello de Boqueixón acolleu esta semana un acto de recoñecemento ás tres judokas da Escola Judo Club Boqueixón que veñen de acadar importantes éxitos deportivos a nivel galego e estatal. O alcalde, Ovidio Rodeiro Tato, recibiu no salón de plenos a Lucía Munín, Lucía Pol e Irene Ferreiro, a quen trasladou o parabén oficial en nome da veciñanza polos seus logros nos recentes campionatos autonómico e nacional disputados no mes de abril.
No Campionato Galego Escolar Infantil celebrado en Lugo, as tres deportistas acadaron medalla: Irene Ferreiro, de Santa María, foi subcampioa galega en menos de 48 kg; Lucía Munín, veciña de Lestedo, tamén logrou o subcampionato en menos de 40 kg; e Lucía Pol, de Sergude, conseguiu a medalla de bronce na categoría de menos de 63 kg. Estes resultados permitironlles participar no Campionato Nacional, onde Lucía Munín fixo historia ao conseguir a medalla de bronce, converténdose así na primeira deportista do municipio en lograr unha medalla nacional nunha modalidade olímpica. Pola súa parte, Lucía Pol tivo tamén unha destacada actuación, chegando aos cuartos de final e quedando a un paso do podio.
Durante a visita ao Concello, as judokas e representantes do club aproveitaron para presentar as tres actividades deportivas que se desenvolverán nas vindeiras semanas no municipio. A primeira será este sábado 24 de maio, cunha xornada especial protagonizada por Marta Arce Payne, recoñecida judoka con medallas en catro Xogos Paralímpicos e varios títulos mundiais e europeos. Arce ofrecerá unha charla no ximnasio do Forte ás 12:00 horas e, xa pola tarde, impartirá unha clase de judo adaptado a partir das 16:00 horas.
O sábado 31 de maio, o pavillón municipal do Forte acollerá o VIII Torneo de Primavera Kumi Kata, un evento aberto á participación de judokas de diferentes niveis. E o venres 6 de xuño, será a quenda dunha clase de defensa persoal na sede da Skola en Lestedo.
Estas actividades contan co apoio do Concello de Boqueixón, a Federación Galega de Judo e diversas entidades colaboradoras como Iberdrola, Invbit, Skola e NKL. A Escola Judo Club Boqueixón continúa así a súa aposta pola promoción do deporte entre a mocidade e pola visibilización do talento local no ámbito do judo.
