O Concello de Santiago amósase disposto a intervir como mediador no conflito aberto entre os traballadores de Urbaser, empresa concesionaria da limpeza viaria e recollida do lixo, e a propia compañía, logo do anuncio dunha folga indefinida que comezará o sábado 24 de maio, en plena semana da Ascensión. Así o confirmou este luns o concelleiro de Sustentabilidade Ambiental e Servizos Básicos Comunitarios, Xesús Domínguez, quen advertiu que a capacidade de actuación do goberno municipal é limitada.
Domínguez explicou en rolda de prensa que o comité de empresa trasladoulle as súas reivindicacións nun encontro mantido o pasado venres, pero incidiu en que estas corresponden ao ámbito das negociacións colectivas entre o persoal e a empresa. “Entendemos que son cuestións que están dentro do espazo das negociacións colectivas coa empresa”, declarou o edil, deixando claro que, malia a disposición ao diálogo, o Concello ten unha marxe de manobra reducida.
A intención de Raxoi é actuar como interlocutor entre ambas as partes, para facilitar o entendemento e evitar que o paro indefinido afecte de forma significativa á cidade. “Tentaremos en calquera caso mediar, pero sabendo que pouca marxe temos neste caso”, insistiu Domínguez, quen tamén expresou o desexo de que se produzan avances antes da fin da semana e se alcance un acordo que permita desconvocar a folga.
O Concello xa está a traballar nun protocolo de servizos mínimos para garantir a salubridade pública durante os días de mobilización, especialmente tendo en conta que as datas coinciden coa celebración das festas da Ascensión. “Nunca é un bo momento para unha folga de servizos básicos”, recoñeceu Domínguez, polo que se busca minimizar os efectos sobre a veciñanza e o funcionamento da cidade.
