O Concello de Santiago oficializou hoxe nun pleno extraordinaro que deu comezo ás 9:00 horas o paso ao grupo dos non adscritos dos catro edís expulsados do PSdeG: Mercedes Rosón, Gonzalo Muíños, Mila Castro e Marta Álvarez. A medida implica tamén unha reestruturación das comisións municipais, así como a limitación da participación destes representantes noutros órganos da corporación.
Durante a sesión, o concelleiro Gonzalo Muíños pediu a palabra para criticar con dureza o procedemento seguido polo partido e as consecuencias políticas da súa expulsión. “Expúlsasenos dun partido, pero tamén se abre a porta a que se nos exclúa de 25 órganos de representación e participación política”, asegurou. Segundo explicou, os catro edís manterán a súa presenza nas catro comisións municipais principais, aínda que cun voto ponderado conforme á súa representatividade, pero non terán acceso ao resto de estruturas colexiadas do Concello.
Muíños sostivo que a decisión responde a unha estratexia do PSdeG para limitar a súa acción institucional e acusou ao partido de “autocratismo político”. Tamén puxo en cuestión que os órganos internos dunha formación política poidan alterar a representación escollida pola cidadanía: “Non se pode substituír a vontade das urnas pola vontade dun partido”, afirmou no seu discurso, que prolongou durante máis de seis minutos.
A reconfiguración das comisións de traballo, segundo se recolleu no informe levado a pleno, implicará que as catro persoas non adscritas manteñan participación en áreas como Urbanismo, Área Social ou Presidencia, mais sen presenza noutras entidades como consellos sectoriais ou organismos de participación veciñal.
A intervención de Muíños foi a única voz dos edís afectados durante a sesión, mentres que desde o grupo municipal socialista destacouse que a medida responde ao cumprimento estrito das normas internas e dos procedementos establecidos. “Trátase de aplicar as normas, nada máis”, apuntaron desde a bancada socialista ao peche do debate.
