Carlos Alberto García, un peregrino de México, recibiu o certificado que o convirte no peregrino ‘dual’ número 10.000. Segundo informou o Concello de Santiago, Carlos Alberto García chegou a semana pasada a Hongu Taisha, onde finalizou o Kumano Kodo, despois de que hai anos concluíse tamén o Camiño de Santiago. Este peregrino foi recibido cunha cerimonia de purificación. Santiago de Compostela e Tanabe traballan conxuntamente desde o ano 2008, cando se asinou o primeiro convenio de colaboración entre ambas as cidades que sentou as bases dunha relación cada vez máis profunda. Un dos proxectos máis importantes naceu no 2015, cando se creou o ‘Pasaporte Dual’.
O ‘Pasaporte Dual’ concíbese como un documento semellante á credencial do Camiño de Santiago, pero no que se recoñece que se fixeron as dúas rutas, o Camiño de Santiago e o Kumano Kodo, ambos os declarados Patrimonio da Humanidade. Cando unha persoa completa os dous Camiños recibe un certificado e un alfinete conmemorativo cos símbolos propios de ambas as rutas de peregrinación, a vieira do Camiño de Santiago e o corvo de Tanabe, e sóbese unha fotografía a unha web común como recordo dixital do logro conseguido.
XAPÓN, PAÍS CON MÁIS PEREGRINOS DUAIS
Coa chegada de Carlos Alberto García alcánzase xa unha cifra moi relevante que, segundo destaca o Concello de Santiago, evidencia a forza que está a ter esta iniciativa de colaboración. O certificado 5.000 entregouse o 11 de outubro do 2023 en Santiago a unha peregrina procedente de Singapura; e desde a súa creación no 2015, percorreron xa ambos os camiños persoas procedentes de máis de 70 países.
O país con maior número de peregrinos duais é Xapón, con máis de 1.800. En segundo lugar está EE.UU., 1.300; seguido de Taiwan, e Australia. Todos estes países superan os máis de 1.000 ‘Pasaportes Duais’. Ambos os Camiños son Patrimonio da Humanidade e, a pesar de que se atopan en continentes distintos, Europa e Asia, son capaces de atraer entre os primeiros lugares a turistas doutros dous continentes, Oceanía e América.
