A deputada do Grupo Popular, Carmen Pomar, xunto ao concelleiro do PP Adrián Villa, esixiron á alcaldesa de Santiago, Goretti Sanmartín, unha explicación inmediata sobre a decisión do Concello de contratar unha empresa privada para realizar os traslados dos asistentes á Asamblea de Cidades Patrimonio da Humanidade. A medida, que inclúe un total de 29 desprazamentos, foi duramente criticada polo colectivo de taxistas locais, que denuncian a desconsideración do Concello cara aos seus servizos. Segundo Pomar, a situación resulta contraditoria, xa que a alcaldesa anteriormente advertira con sancións ás empresas que realizaran transporte urbano de maneira ilegal, mentres ela mesma estaba contratando os servizos privados de VTCs.
Carmen Pomar e Adrián Villa mantiveron unha reunión con representantes do colectivo de taxistas composteláns para recibir información directa sobre os seus problemas e inquedanzas relacionadas co servizo de transporte público na cidade. Durante o encontro, os taxistas expresaron o seu malestar por unha “falta de transparencia” e incoherencia na actuación do Concello, especialmente en relación coa contratación dos servizos privados. A deputada popular acusou á alcaldesa de “fuxir das preguntas” e de “mentir para xustificar a contratación de empresas privadas”.
Pomar tamén aproveitou para subliñar as deficiencias no servizo de transporte público en Santiago de Compostela, sinalando que a cidade experimenta un caos na prestación do servizo, tanto para composteláns como para turistas. A súa principal crítica foi a incapacidade do Concello de dar unha resposta eficaz á demanda de transporte, deixando aos taxistas “desbordados en moitos momentos do día”, ao tempo que se adoptan medidas represivas contra outras alternativas como as VTCs.
Pola súa banda, o concelleiro Adrián Villa reprobou que a alcaldesa estivésemos “meses dicindo que as VTCs son ilegais”, mentres ao mesmo tempo estaba contratando os servizos destas empresas. Villa tamén se cuestionou se o Concello emitirá algunha infracción contra a súa propia administración, dada a ilegalidade dos traxectos contratados para a Asamblea.
Os taxistas, á súa vez, subliñaron a necesidade de que o Concello adopte medidas claras e coherentes para mellorar a xestión do transporte público e garantir que se poidan cubrir todas as necesidades de mobilidade da cidade de maneira eficiente e transparente.
