A concelleira do Partido Popular de Santiago, Yolanda Otero, expresou a súa preocupación pola situación de abandono que presenta o barrio de Vista Alegre debido á falta de mantemento nos espazos públicos. Otero asegurou que a vexetación medra sen control, invadindo áreas recreativas e de descanso que deberían estar accesibles e en boas condicións para a veciñanza.
A edil popular criticou ao goberno municipal, liderado polo BNG, asegurando que “é inexplicable a total falta de mantemento e atención dos bancos e espazos de uso público nesta zona de Compostela”. Otero afirmou que a situación reflicte a inoperatividade do goberno nacionalista, que “non é capaz de levar a cabo as súas máis elementais funcións”, e destacou que a vexetación descontrolada está afectando directamente a calidade de vida da veciñanza.
A concelleira recalcou que os veciños e veciñas teñen dereito a gozar de espazos públicos “en condicións saudables” e lembrou que o goberno municipal debe garantir que estes espazos sexan “seguros e accesibles”. Segundo ela, a biodiversidade debe estar vinculada a espazos que melloren o benestar da cidadanía, e non á súa desatención.
Otero tamén manifestou que, para o Partido Popular, a xestión pública na cidade de Santiago “só existe na publicidade nacionalista” e acusou ao goberno de desleixo e pasividade. A edil concluíu que os veciños e veciñas de Santiago “non merecen esta desidia” e que o seu partido seguirá denunciando esta situación. A súa crítica tamén foi dirixida á imaxe que a cidade ofrece aos cidadáns e visitantes, destacando que imaxes de descoidado como as do barrio de Vista Alegre dan mala conta do estado real dos espazos públicos en Santiago.
