O portavoz da Executiva Nacional do PSdeG, Julio Torrado, criticou este venres a “lentitude” e a “parsimonia” da alcaldesa compostelá, Goretti Sanmartín, para convocar o pleno extraordinario no que o catro concelleiros de Santiago que foron expulsados do PSOE pasen a ser edís non adscritos.
“Xa podería celebrarse o pleno, esa foi unha decisión política. O único que vemos é que a alcaldesa vai con certa lentitude, con certa parsimonia e con poucas ganas de avanzar nas cousas. Recoñecemos a súa coherencia sobre como está a gobernar Santiago, pero pedímoslle que sexa un pouco áxil para tomar decisións”, aseverou Torrado en rolda de prensa.
Preguntado polo informe que debe ser emitido polo secretario municipal sobre a situación dos edís, o portavoz socialista asegurou que este “debe estar próximo”, pero tamén insistiu en que “se superaron todos os prazos da lóxica política”.
Neste sentido, fixo fincapé en que o goberno local de Santiago ten unha alcaldesa “que funciona con pausa” e sinalou a súa sorpresa por unha lentitude “que todo apunta que é intencionada”.
Con todo, tamén asegurou “non ter capacidade de valorar un proceso xudicial” e defendeu que “todas as persoas teñen dereito a recorrer ao sistema xudicial”.
