A Sociedad Deportiva Compostela (SD Compostela) e a empresa Cobre San Rafael, propietaria da mina de Touro, seguirán reforzando a súa relación durante as dúas próximas tempadas ao renovar e ampliar o seu acordo de patrocinio. Esta alianza, que xa se mantén desde hai varias tempadas, segundo aseguran dende o clube deportivo, “permitirá consolidar o apoio de Cobre San Rafael á Canteira Picheleira“, así como ao Juvenil A de División de Honor, que competirá por quinta tempada consecutiva na máxima categoría nacional.
Ademais de continuar co seu patrocinio aos equipos de base, Cobre San Rafael asume un novo rol, pasando a ser o patrocinador principal do equipo Juvenil A. Este compromiso tamén inclúe a continuidade do patrocinio dos Campus Xacobeos, tanto nas edicións de verán como nas de inverno. Do mesmo xeito, a empresa seguirá sendo un dos patrocinadores principais do primeiro equipo do Compos.
A SD Compostela quixo agradecer á empresa a súa confianza no proxecto do club, así como o seu apoio ao desenvolvemento do deporte base e o fútbol sénior en Santiago e a súa comarca. A renovación deste acordo subliña o compromiso de ambos cos valores do esforzo, a humildade e a superación, e reforza o obxectivo común de formar xogadores e persoas nun ambiente de traballo en equipo e mellora continua.
