Un total de 1.400 alumnos de educación infantil, primaria e secundaria de 17 centros educativos da comarca, correrán este xoves, día 8, pola defensa da lingua galega en Santiago de Compostela.
A alcaldesa de Santiago, Goretti Sanmartín, presentou o ‘Correlingua 2025’, que partirá da Alameda este xoves ás 11.00 horas, con dous percorridos adaptados, un para os máis pequenos e outro para os estudantes de secundaria.
Tal e como salientou, a xornada é un evento magnífico por unir “a defensa da lingua cun elemento que mellora a saúde e o benestar”. Nesta liña, subliñou as boas porcentaxes de uso do galego en Santiago e a participación de ata 11 centros da cidade na xornada deportiva.
A mandataria local destacou que esta presentación se produce no marco dun día “histórico”, xa que o 6 de maio de 1931 o Seminario de Estudos Galegos presentaba o seu anteproxecto do Estatuto de Autonomía de Galiza.
Ademais, no contexto da Feira do Libro que se celebra actualmente na cidade, Sanmartín valorou a achega das librarías da cidade, que proporcionaron libros para os premios dos distintos concursos que se celebrarán ao terminar a carreira.
Con todo, a alcaldesa alentou a todos os habitantes da cidade a sumarse a animar aos corredores porque o evento é unha festa de celebración do “privilexio que é contar cunha lingua propia”.
