O Club de Patinaxe Artística Brión (CPA Brión) volveu destacar na Copa de España – IX Trofeo Cidade de Alcoy, celebrada o pasado sábado 26 de abril na localidade alicantina de Alcoy. O equipo brionés logrou alzarse co segundo posto do podio, colgándose a medalla de prata, un logro que revalida o seu éxito do ano anterior.
Este trofeo, no que participaron 23 equipos de diferentes comunidades autónomas de toda España, supón o terceiro ano consecutivo no que o CPA Brión logra subirse ao podio. En 2023 conseguiron a medalla de prata, en 2024 foron bronce e, nesta edición, repiten na segunda posición.
O equipo brionés está composto por doce patinadoras: Leire, Alba, Marta, Antía, Yaisa, Icía, Flavia, Paula M., Carla, Greta, Paula A. e Zaira, quen se mostraron moi satisfeitas coa súa actuación. As patinadoras melloraron a súa puntuación respecto ao Campionato de España e destacaron a experiencia vivida no evento.
O equipo técnico, liderado por Natis e Andrea, tamén se mostrou orgulloso do traballo realizado, destacando que “é un soño ter conseguido tres medallas neste campionato e as tres consecutivas, algo inimaxinable debido ao nivel de cada ano, pero é o resultado de moito esforzo e dedicación por parte do equipo técnico, das patinadoras, das familias e patrocinadores, xa que sen eles non sería posible poder participar”.
