A Consellería de Educación, Ciencia, Universidades e FP anunciou a licitación da obra para o cambio de cuberta do CEIP de Barouta, no municipio de Ames, cun investimento superior aos 230.000 euros. O obxectivo principal desta actuación é mellorar a eficiencia enerxética do centro, contribuíndo a unha maior sustentabilidade e aforro enerxético nas súas instalacións.
A previsión do proxecto, que se atopa suxeito aos trámites administrativos correspondentes, é iniciar os traballos a finais do mes de xuño, tras a finalización do curso académico, e rematar a obra en setembro deste ano. A actuación consistirá na substitución da cuberta actual por unha nova de paneis sándwich de 30 mm de espesor, que incluirá illamento tanto na cubrición como no forxado. O proxecto contempla a instalación de 1600 m² de cuberta inclinada de panel metálico, xunto con 133,5 m² de impermeabilización para cubertas planas.
Ademais, durante a obra tamén se instalarán novos canlóns e baixantes, os cales se conectarán á rede existente do centro educativo.
Este investimento forma parte dun conxunto de actuacións no municipio de Ames, que, no total, ascenden a preto de 16 millóns de euros destinados á mellora das infraestruturas educativas. O proxecto máis destacado deste paquete de actuacións é a construción dun novo colexio no Milladoiro, actualmente en fase de licitación cun orzamento superior aos 12 millóns de euros. Ademais, xa se completou a ampliación do CEIP Agro do Muíño, cun investimento de máis de 3,4 millóns de euros.
Estas melloras están dentro do marco do Plan de nova arquitectura pedagóxica, unha iniciativa da Xunta para modernizar as infraestruturas educativas galegas. O plan tamén responde á demanda de prazas escolares en determinadas áreas, como é o caso do Concello de Ames, onde se están realizando novas construcións e ampliacións de centros educativos para mellorar a oferta educativa na comarca.
