A portavoz do Goberno local, Míriam Louzao, asegurou que o Concello “axudará a resolver” conflitos como o do persoal de Urbaser coa empresa, polo que este mércores se concentrarán diante do Pazo de Raxoi, aínda que aclarou que “non está en man” do consistorio resolver propiamente as demandas. Preguntada a este respecto este luns en rolda de prensa, a concelleira trasladou que o edil de Sustentabilidade Ambiental e Servizos Básicos “coñece as demandas de persoal e reunirase coa representación sindical cando o soliciten”.
“O Concello, na medida en que poida, axudará a resolver este tipo de conflitos polo ben do servizo público e polo ben da cidadanía”, subliñou Louzao. Con todo, desmarcou ao consistorio na toma de decisións respecto das condicións relacionadas cos traballadores, que critican unha paralización da negociación do convenio colectivo. “Son cuestións que teñen que tratar os traballadores coa empresa”, remarcou.
