A Xunta de Goberno Local de Santiago de Compostela aprobou unha serie de actuacións urbanísticas e culturais tras confirmar a reapertura da rúa do Pombal, que se produciu hoxe tralo remate das obras cun orzamento superior aos 760.000 euros. A reforma, segundo explicou a tenente de alcaldesa María Rozas, completouse dentro do prazo previsto, cunha duración total de oito meses e dous días, e supuxo unha transformación integral da accesibilidade e das instalacións da vía.
A apertura tivo lugar despois do acto formal de recepción celebrado o venres pasado, aínda que queda pendente unha pequena intervención na parte superior da rúa, relacionada cun rebaixe da beirarrúa, que non se puido acometer por cuestións de pluviais. Esta actuación engadida levarase a cabo unha vez se interveña na rúa adxacente, San Clemente, para garantir a correcta drenaxe da zona.
REXEITAMENTO DE SOLICITUDES DE REHABILITACIÓN
En paralelo, a Xunta de Goberno rexeitou dúas solicitudes de licenza para rehabilitacións en inmobles da zona vella: un na rúa dos Loureiros, 14, e outro na rúa de San Roque, 23. Ambos edificios están incluídos no procedemento de venda forzosa aprobado o pasado mes de marzo, tras constatarse o seu estado de ruína desde 2010 e o incumprimento do deber de conservación.
No caso da rúa dos Loureiros, o proxecto foi denegado por infraccións do Plan Especial da Cidade Histórica, como a incorporación de galerías non autorizadas, escaleiras fóra de tipoloxía, problemas de iluminación e dimensións nas vivendas. O informe técnico considera ademais incompleta a documentación presentada.
Pola súa banda, o proxecto de San Roque foi rexeitado por pretender ampliacións sobre parcelas protexidas, eliminar elementos catalogados como chemineas ou portas, e propoñer dúas galerías que non cumpren os criterios establecidos no plan urbanístico da zona histórica.
OBRAS DE REHABILITACIÓN
O Goberno local tamén deu luz verde á contratación das obras de rehabilitación de firmes asfálticos en oito rúas que presentan un estado deficiente, cun orzamento base de 460.004 euros e un prazo de execución de catro meses. As intervencións realizaranse nas rúas do Castiñeiriño, das Canteiras, da Moa, Porto de Amio, da Mariñeira, das Mulas, do Tambre e dos Irmandiños.
Outro contrato aprobado foi o da reparación da cuberta do polideportivo do Restollal, construído en 1991, e que presenta filtracións e deterioro estructural. Esta intervención, cun orzamento de 73.387 euros, será executada en dous meses e está previsto que se desenvolva no verán de 2025.
Finalmente, Rozas anunciou a publicación das bases para participar no Mercado do Libro, que se celebrará os días 24 e 25 de maio na Praza de Aurelio Aguirre, no marco do Banquete de Conxo, evento que confirma así as súas datas para este ano. O prazo para inscribirse no mercado estará aberto ata o 5 de maio e terán preferencia as entidades con sede en Santiago.
A concelleira tamén destacou os datos de turismo rexistrados en xaneiro e febreiro, cun incremento do 2,2% respecto ao ano anterior, como mostra da liña positiva cara á desestacionalización. En canto ás posibles mobilizacións laborais en servizos municipais, Rozas indicou que o Concello respecta as demandas do persoal e está disposto a mediar, aínda que lembrou que moitas destas cuestións son competencia directa das empresas concesionarias.
