A rúa do Pombal, pechada ao tráfico dende xuño de 2024 por mor das obras de mellora, volverá estar operativa nos próximos días, segundo avanzou este venres a alcaldesa de Santiago, Goretti Sanmartín. A rexedora explicou que a apertura se producirá “unha vez emitido o informe de recepción formal”, documento que acredita o cumprimento dos requisitos técnicos e xurídicos necesarios para a súa posta en servizo.
Durante a súa intervención ante os medios, Sanmartín indicou que os servizos municipais xa revisaron a actuación e confirmaron que está todo correcto. A actuación, incluída no plan municipal de renovación de espazos urbanos, tiña como obxectivo mellorar o estado do firme e renovar as infraestruturas soterradas, nunha rúa de especial tránsito tanto de vehículos como de peóns, por ser un dos accesos directos ao centro histórico desde a zona sur da cidade.
A alcaldesa respondeu tamén ás preocupacións manifestadas por veciños e colectivos, que nos últimos meses advertiran sobre dificultades para transitar polas beirarrúas en cadeira de rodas ou con carriños de bebé. Sanmartín asegurou que se tivo en conta esta cuestión e que se garantiu a máxima accesibilidade en todos os puntos da rúa reformada: “Ese foi un criterio prioritario á hora de executar as obras”, subliñou.
A apertura da rúa do Pombal suporá a recuperación dun dos principais eixos de entrada ao casco histórico, especialmente relevante para o acceso peonil e rodado ao entorno da Alameda e á zona da Porta Faxeira. A reactivación do tráfico nesta vía tamén terá impacto na reorganización dalgunhas liñas de transporte público e na mobilidade en zonas próximas como o Campus Sur ou a rúa Galeras. O Concello, con todo, non concretou a data exacta de apertura, pero agárdase que se faga efectiva ao longo da próxima semana, unha vez completado o trámite final.
