A Audiencia Provincial da Coruña xulgará o vindeiro mércores na súa sede compostelá a un home que se enfronta a catro anos e prisión por un delito continuado de falsidade documental e a outro de estafa. Segundo o escrito da Fiscalía, os feitos producíronse no ano 2022 cando o acusado, intermediario habitual na venda de vehículos e sen antecedentes penais, cobrou 25.305 euros cunha suposta estafa á empresa Vayper automoción.
En concreto, en setembro de 2022 o acusado enviou un correo electrónico ao administrador mercantil de Vayper co orzamento de venda de cinco vehículos, a oferta incluía un Audi A5 por 14.500 euros, un Seat León por 12.500, un Smart Four por 2.500, un Nissan Qashqai por 6.990 e un Volkswagen Tiguan por 16.900 euros. En total a venda sumaba 53.390 euros e o administrador aceptou a oferta e ingresou o diñeiro nunha conta corrente, conta do acusado que agora se enfronta a pena de cárcere.
Tras recibir o diñeiro, o acusado fixo a entrega e no canto de cinco foron só tres os vehículos que entregou: o Smart, o Nissan Qashqai e o Seat León. Ademais, as facturas foran “manipuladas” e modificouse “a data de emisión das mesmas así como o prezo dos vehículos de forma que se reducía notablemente o seu importe”. Con todo, o acusado enfróntase a un delito continuado de falsidade documental e a outro de estafa, por todo iso, o Ministerio Fiscal solicita unha pena de catro anos de cárcere e unha multa de doce meses a razón de dez euros diarios. Ademais, en concepto de responsabilidade civil indemnizarase ao administrador de Vayper automoción coa cantidade de 25.305 euros.
