Os orzamentos do Concello do Santiago de Compostela foron aprobados este venres de forma definitiva tras non admitir o pleno, co voto a favor do seis concelleiros do Grupo Socialista, as alegacións presentadas pola asociación de veciños de Volta do Castro, que reclamaban máis investimentos para a zona.
Na sesión na que o concelleiro Gonzalo Muíños aínda exerceu de portavoz do Grupo Municipal do PSOE, os seis socialistas –os dous afíns á dirección e os catro expulsados– mantiveron o apoio dado ás contas no pleno de febreiro e votaron a favor de inadmitir a alegación coa aprobación definitiva do orzamento.
A única formación que se mostrou en contra foi o PP, cuxa concelleira Rosario Ferreiro volveu a deixar claro o rexeitamento dos populares ás contas e acusou ao goberno local de ser “incapaz” de cumprir a súa palabra.
VOTO A FAVOR DO GOBERNO LOCAL E DO PSOE
No debate, o concelleiro de Facenda, César Vila, explicou que a formulada pola Asociación Volta do Castro – O Rial foi a única que se recibiu e sinalou que a Oficina de Xestión Orzamentaria e Contabilidade emitiu un informe no que conclúe que “non concorre a necesaria condición habilitante para atender o alegado”.
Pola súa banda, Gonzalo Muíños subliñou que os concelleiros socialistas seguirán esixindo “todo o que faga falta” para que se cumpra cos veciños e considerou que as cuestións que se inclúen nas alegacións “non requiren dunha partida específica”, senón que se poden abordar “con partidas de mantemento ou reparación”, como os firmes ou os puntos de luz que se reclaman.
Dito isto e tras considerar que a alcaldesa debe dar resposta a estas peticións nos próximos meses, reiterou a postura dos socialistas no pleno de febreiro e indicou que se trata duns orzamentos bos, progresistas e sociais“, que “inclúen todas as cuestións demandadas polo Grupo Municipalista”, como “a dobre convocatoria dos Bonos corazón”.
En fronte, a edil do PP censurou que o goberno local “non fose capaz de levar a cabo as actuacións demandadas polos veciños” e asegurou que non se debe a “falta de dispoñibilidade orzamentaria”, tendo en conta que son “os orzamentos máis altos de Santiago” e haberá “remanentes”.
INTERVENCIÓN DA ALCALDESA
Pola súa banda, nun debate no que tamén tomou a palabra María Rozas (Compostela Aberta) para pór en valor as contas, a alcaldesa, Goretti Sanmartín, agradeceu o voto a favor dos concelleiros socialistas e destacou que a demanda dos veciños está a atenderse “con proxectos que están en marcha”, “actuacións que xa foron efectuadas e outras que se farán noutros meses”.
Ademais, incidiu en que procede a inadmisión porque non se entra nos supostos de alegacións que a lei de facenda permite como asumibles na aprobación das contas, uns orzamentos que defendeu como “bos para os veciños, necesarios e que inciden en que poida haber melloras tanto en obras como en servizos, e políticas de vivenda, culturais, deportivas.
