O Monbus Obradoiro impúxose ao Movistar Estudiantes nun dos encontros máis esperados da tempada no Multiusos Fontes do Sar, cunha actuación marcada pola intensidade e o apoio da bancada. Ao remate do encontro, o novo adestrador do Estudiantes, Nacho Lezkano, compareceu en rolda de prensa para ofrecer a súa valoración.
Durante a súa intervención, Lezkano comezou por felicitar ao Obradoiro: “Foi o merecido gañador. Xogou con máis enerxía, con máis fe, e iso explica o resultado”. O técnico destacou que a calidade do equipo compostelán, unida ao ambiente no pavillón, fixeron a diferenza: “Aquí, arroupados pola súa xente, é difícil competir se non estás ao nivel de intensidade que se require”.
FALTA DE CONEXIÓN NO XOGO DO ESTUDIANTES
Lezkano recoñeceu que varios dos seus xogadores estiveron “atenazados”, sen lograr mostrar o seu verdadeiro nivel. “Hai que recuperar xogadores que están moi por debaixo do que deben e poden dar”, indicou, marcando así o camiño a seguir para as próximas semanas.
En canto ao desenvolvemento do xogo, apuntou que o equipo cometeu “demasiados erros defensivos”, especialmente en situacións de dous contra dous e no xogo sen balón. “Melloramos algo no terceiro cuarto, cando logramos achegarnos no marcador, pero eles souberon responder moi ben”, explicou.
Preguntado pola situación actual do seu equipo e o traballo previo, Lezkano preferiu manterse prudente: “Non vou facer comentarios sobre o que me atopei por respecto ao corpo técnico anterior. Cada adestrador ten a súa visión do baloncesto”.
Sobre o xogador Patricio Garino, aclarou que a súa ausencia responde a motivos médicos: “Está na fase final da súa recuperación, pero aínda non fixo adestramentos de contacto. Sería arriscado poñelo xa en pista”.
O técnico incidiu en que o Estudiantes debe conseguir que “máis xogadores se impliquen no xogo”, e que o equipo non pode depender só do acerto individual. “Temos unha plantilla longa, igual que o Obradoiro. Todos deben sumar”.
Así pechou Lezkano a súa intervención tras a derrota en Santiago, onde destacou a necesidade de reconstruír o equipo e elevar a intensidade de xogo para os vindeiros compromisos, coa vista posta na loita polo ascenso directo.
