O Monbus Obradoiro afronta este sábado un dos partidos máis destacados da tempada fronte ao Movistar Estudiantes, coa vista posta en manterse na zona alta da clasificación e seguir optando ao ascenso directo á ACB. O encontro disputarase no Multiusos Fontes do Sar ás 18:30 horas e estará acompañado dunha iniciativa solidaria en apoio ás persoas afectadas pola ELA, coa homenaxe ao exxogador Urbano González.
Na presentación do encontro celebrada no Hotel Oca Puerta del Camino, un dos patrocinadores do club, o adestrador Moncho Fernández subliñou a importancia do partido: “É un dos encontros máis atractivos do curso polo momento da tempada, o nivel do rival e o interese que está a xerar”. O Estudiantes chega como segundo clasificado, con opcións intactas de ascenso e estreando novo adestrador, Nacho Lezkano, tras unha inesperada mudanza no banco madrileño esta mesma semana.
RECOÑECEMENTO A URBANO GONZÁLEZ E VISIBILIDADE PARA A ELA
O club tamén anunciou que aproveitará o evento para dar visibilidade á esclerose lateral amiotrófica (ELA) a través dun acto en lembranza de Urbano González, exxogador e actualmente afectado pola enfermidade. Durante o partido, habilitarase un espazo para adquirir o conto ‘Urzapa, la empresa que enfermó a Lela’, escrito por unha persoa próxima a Urbano, cuxos beneficios irán destinados á investigación sobre a ELA.
“É unha enfermidade que arrasa coa autonomía das persoas e que require atención constante. O 70% dos doentes opta pola eutanasia por non poder asumir os custos que implica vivir con esta doenza”, explicou visiblemente emocionado o adestrador compostelán, quen agradeceu ao club esta iniciativa solidaria.
SITUACIÓN DEPORTIVA E LESIÓNS
O equipo santiagués chega ao encontro tras oito vitorias nos últimos nove partidos, pero con dúbidas físicas en dous xogadores: Michalak, afectado por unha sinusite vírica, e Millán Jiménez, cun esguince no nocello. A decisión sobre a súa dispoñibilidade tomaráse nas horas previas ao partido.
O corpo técnico tamén valorou a posibilidade de reforzos antes do peche de mercado, aínda que Moncho Fernández aclarou que “non está previsto ningún movemento, salvo que xurda unha oportunidade irrenunciable”.
En canto ao rival, destacou a figura de Jayson Granger como peza clave no xogo dos estudantes, especialmente nas situacións de bloqueo directo. “É posiblemente o xogador máis determinante da liga, con case 30 minutos por partido e un control absoluto do ritmo”, comentou.
AMBICIÓN E CAUTELA NUN FINAL DE TEMPADA EXISTENTE
O adestrador tamén advertiu contra os perigos dunha euforia prematura ou dunha derrota que xere dúbidas: “Quedan nove partidos. Non podemos perder o foco. O obxectivo é chegar ao 8 de xuño celebrando un ascenso”. Insistiu tamén en que os xogadores deben priorizar o rendemento colectivo por riba do individual: “A rotación dependerá do que precise cada partido, non hai patróns fixos”.
O club espera unha gran entrada en Sar, animada tamén polo impulso da afección que recentemente se desprazou en masa a Ourense. O ambiente prevese especial, tanto pola transcendencia deportiva como pola carga emocional da homenaxe a Urbano.
O encontro poderá marcar un punto de inflexión na loita polo ascenso á máxima categoría do baloncesto estatal.
