O Centro de Saúde de Bertamiráns podería ser obxecto dunha ampliación nos vindeiros anos para adaptar as súas instalacións ao aumento de poboación que rexistra o Concello de Ames. Esta foi unha das conclusións da visita realizada ao centro polo xerente da área sanitaria de Santiago de Compostela, Ángel Facio, quen estivo acompañado polo alcalde de Ames, Blas García, e pola concelleira de Promoción da Saúde, Susana Señorís.
Na reunión tamén participaron Ana Turnes, subdirectora de Atención Primaria, e José Manuel Fernández Torres, subdirector de Recursos Económicos, que analizaron as necesidades do centro sanitario, así como as demandas trasladadas polos seus profesionais en canto a dotación de persoal e material.
Un dos aspectos abordados foi a necesidade de mellorar a accesibilidade e modernizar as instalacións, que presentan signos de obsolescencia. Neste sentido, o xerente da área sanitaria sinalou que será necesario elaborar un plan para a reforma do edificio, así como estudar a viabilidade dunha futura ampliación, para a cal se contemplaría o uso dos terreos anexos.
O alcalde de Ames, Blas García, destacou a importancia de adaptar os servizos sanitarios ao continuo crecemento poboacional do municipio. Segundo afirmou, “Ames é o único concello galego que medra de maneira sostida e conta con dous núcleos urbanos diferenciados que precisan servizos axeitados”. García tamén lembrou o esforzo da Xunta na construción do Centro de Saúde do Milladoiro, mais insistiu en que é necesario seguir investindo para atender a demanda sanitaria da localidade.
COMPROMISO INSTITUCIONAL
Desde o Concello de Ames reiterouse a total vontade de colaboración coas autoridades sanitarias para levar a cabo as melloras necesarias no centro de saúde de Bertamiráns. O xerente da área sanitaria destacou que é fundamental avaliar as necesidades futuras en función da evolución demográfica, co obxectivo de garantir unha atención sanitaria eficiente e de calidade para os veciños.
Esta reunión supón un primeiro paso para planificar a modernización e posible ampliación do centro sanitario, unha medida que responde ao crecemento poboacional do municipio e á necesidade de adecuar os servizos públicos ás novas realidades da cidadanía.
