O Grao en Medicina pola Universidade de Santiago de Compostela (USC) arrincará o proceso para derivar máis clases a outras cidades de Galicia. O primeiro paso será que as prácticas de 4º e 5º curso se impartan tamén nos hospitais de Vigo e A Coruña. Así o avanzaron, ao termo dunha reunión, os conselleiros de Sanidade e Educación, Antonio Gómez Caamaño e Román Rodríguez, o reitor da USC, Antonio López, e o decano da Facultade de Medicina en Santiago, Julián Álvarez, que continuará como o único centro universitario de Galicia que impartirá esta titulación e como o máis grande de España.
Este proceso de descentralización –aínda que os responsables da Xunta rexeitan este termo e prefiren falar de “optimización” da docencia– busca “ter a mellor docencia posible” aproveitando os recursos de todo o Servizo Galego de Saúde (Sergas) e evitando concentrar a todos os estudantes no Hospital Clínico de Santiago. Sobre a posibilidade de dar máis pasos cara ao futuro, por exemplo levar tamén a outras cidades galegas a docencia, mesmo teórica, aínda non se avanzou. Para todo este proceso conformarase un equipo de traballo.
