A cidade de Santiago de Compostela será unha das localidades galegas que participará na primeira manifestación estatal pola vivenda, convocada para o sábado 5 de abril. A mobilización, promovida pola plataforma Xuntanza pola Vivenda, partirá da Praza do Toural ás 12.00 horas, e busca visibilizar a problemática do acceso á vivenda na capital galega.
A protesta forma parte dunha convocatoria máis ampla, promovida polos sindicatos de inquilinas e outras organizacións locais en todo o Estado, baixo o lema “Acabar co negocio da vivenda”. As cidades galegas de A Coruña, Santiago e Vigo acollerán marchas en paralelo con esta mesma reivindicación.
A plataforma compostelá Xuntanza pola Vivenda naceu no verán de 2024 ante a crecente preocupación pola situación do mercado inmobiliario na cidade. Os seus integrantes sosteñen que “Compostela non é unha excepción”, e denuncian que a especulación está a deixar “unha cidade que a veciñanza non pode habitar nin gozar”.
Ademais de organizar a mobilización, o colectivo está a realizar asembleas abertas para analizar a situación e coordinar a participación na protesta. A plataforma aposta pola creación de “estruturas de autodefensa” que permitan aos inquilinos organizarse ante problemas como a suba dos prezos do alugueiro, a falta de regulación ou os desafiuzamentos.
CONVOCATORIA ESTATAL E PRECEDENTES NOUTRAS CIDADES
A marcha en Santiago forma parte dunha iniciativa máis ampla que terá réplicas en diversas cidades do Estado. Segundo o comunicado difundido na web da convocatoria (acabemosconelnegocio.es), os organizadores denuncian que “os fondos de investimento e os rentistas seguen acumulando beneficios mentres miles de persoas son desafiuzadas, expulsadas dos seus barrios ou condenadas a vivir en condicións indignas”.
Ademais, critican o papel das administracións, ás que acusan de complicidade na conversión da vivenda nun “modelo de negocio” en lugar dun dereito básico.
A mobilización chega tras protestas similares en Madrid, Bilbao ou Barcelona, onde a presión veciñal logrou impedir desafiuzamentos e mesmo conseguir a compra de edificios por parte das administracións para a súa conversión en vivenda social.
OUTRAS MOBILIZACIÓNS EN GALICIA
Ademais de Santiago, A Coruña e Vigo tamén se sumarán á protesta:
Na Coruña a manifestación sairá ás 12:00 da Praza de Ourense ata María Pita, organizada polo Sindicato de Barrio da Falperra – Os Mallos, e en Vigo sairá dende a praza de España ás 19:00, convocada polo Sindicato de Inquilinas de Vigo e outras entidades locais.
As organizacións que promoven as marchas insisten en que “isto non é só unha manifestación, senón un paso máis na construción dun movemento forte, independente e combativo”, e fan un chamamento á participación de toda a cidadanía.
