O concelleiro de Centros Socioculturais de Santiago, Xan Duro, asegurou que o contrato de licitación da rede de centros socioculturais da capital galega “segue avanzando”, aínda que evitou concretar datas.
En declaracións aos medios nunha visita á Praza de Abastos, o edil insistiu en que continúan “en permanente contacto coa empresa para que manteña a actividade mentres non se finalice a licitación”.
“É un prego moi complexo. Son 43 centros con distintos horarios e actividades e hai que cumprir unha lexislación vixente que non é sinxela. Estamos moi avanzados, pero non podo dicir unha data de previsión ata que vaia a xunta de goberno“, aseverou antes de reiterar que non dará máis datos, insistindo en que mantén conversacións con empresa e traballadores.
Así mesmo, recoñeceu que é “comprensible” a preocupación dos traballadores, polo que afirmou que están a realizar “un traballo intenso de interlocución”, así como administrativo “para pechar o asunto canto antes”.
Cuestionado polas críticas de PSOE e PP sobre este tema, Xan Duro manifestou que “o traballo da oposición é ter dúbidas permanentes, cando non apelacións á apocalipse”. “Todos fomos oposición, todos fomos goberno; a min tócame gobernar, á oposición tócalle facer o seu traballo”, subliñou.
