As tres escolas unitarias do rural de Santiago de Compostela –a da parroquia de Marrozos, a do Eixo e a de Laraño– contarán con servizo de comedor no próximo curso, segundo comunicou este martes a concelleira de Educación, Míriam Louzao. Este servizo estará xestionado e coordinado no “día a día” pola Federación de Anpas Compostela, que agrupa ás organizacións de pais e nais. O servizo de comedor prestarase a través dun cáterin e terá un custo de 4,5 euros por menú, o mesmo que no CEIP da área urbana.
O Concello impulsa esta medida de carácter temporal para prestar este servizo “desde xa” e “non esperar á entrada do novo modelo de comedores”, no que estarán incluídos estes tres centros rurais e que o goberno municipal espera ter listo para o curso 2026-2027. Tanto Míriam Louzao como a presidenta de Fanpa Compostela, Esther Martínez, entenden esta medida como “imprescindible” ante o “perigo” de que as escolas unitarias continúen pechando as súas portas. Por ese motivo, realizan este anuncio a unha semana de que se termine o prazo de matriculación de cara ao próximo curso escolar nos colexios públicos, o 20 de marzo. A intención é, ademais de beneficiar ás familias xa usuarias, “que as que aínda non elixiron unha escola poidan decantarse por elixir unha destas”, sinala Louzao.
CONVENIO
O Concello de Santiago e Fanpa Compostela asinarán un convenio co que o goberno municipal incorporará nos orzamentos do 2025 unha subvención nominativa dirixida á federación pola xestión do servizo. Ademais de colaborar na parte económica, o Concello encargarase das obras para adaptar os espazos destinados ao comedor escolar, que se realizarán ao longo deste verán. Tamén prestará axuda á Fanpa na realización dos trámites administrativos pertinentes coa Xunta. Pola súa banda, na organización de familias recaerán tarefas como a contratación do monitorado e do cáterin ou a xestión da matrícula e dos cobros.
CONCILIACIÓN E DESIGUALDADE
A pesar de que a concelleira de Educación considera que “é a Xunta de Galicia a que ten que prestar o servizo de comedor nos centros educativos públicos”, como xa apunta que fai nun dos colexios da localidade, a edil pensa que é “de xustiza” que as escolas rurais da área municipal conten con esta prestación. “É unha medida que vai favorecer a nosa conciliación da vida persoal, laboral e familiar”, engadiu. Así mesmo, a Fanpa Compostela defende que os servizos de comedor sexan “unha responsabilidade directa das administracións públicas, porque é a súa responsabilidade”, pero neste caso accederon a asumir a xestión do servizo porque a súa falta “podía levar a que tamén decaese a matriculación”. Para Esther Martínez, as familias que empregan o servizo das escolas unitarias vivían “unha situación de desigualdade”. Así, pensa que o destes centros “é un modelo que non debe perderse, cun valor educativo importante”.
