Veterinarios galegos manifestáronse en Santiago para pedir a derrogación do Real Decreto que regula a distribución, prescrición, dispensación e uso de medicamentos veterinarios. A manifestación, baixo o lema ‘Saúde animal sen barreiras. Apoia ao teu veterinario’, arrincou da Alameda compostelá e finalizou na praza do Obradoiro.
Durante a marcha entoaron cánticos como ‘Non é solidario o IVE veterinario’ e portaron pancartas con lemas como ‘Non podemos tratar aos animais cos medicamentos que necesitan’ e ‘Animais sanotes con menos papelotes’. A norma establece a obrigación de rexistrar electronicamente todas as prescricións dos medicamentos mediante a plataforma Presvet (Sistema Informático Central de Control de Prescricións Veterinarias de Antibióticos) para mellorar así a súa rastrexabilidade e combater a resistencia aos antimicrobianos.
