O secretario xeral do PSdeG, José Ramón Gómez Besteiro, dixo este mércores que respecta o manifesto, asinado xa por máis de 500 persoas da sociedade civil compostelá e doutros municipios da zona, en apoio do catro concelleiros de Santiago que foron expulsados do partido: Mercedes Rosón, Mila Castro, Gonzalo Muíños e Marta Álvarez.
Preguntado en rolda de prensa sobre este texto, o líder do PSdeG insistiu no seu “profundo respecto por todas as opinións”, independentemente de se as comparte ou non. Este texto está asinado por figuras destacadas do socialismo galego como o expresidente da Xunta Emilio Pérez Touriño e o exalcalde de Santiago Xosé Sánchez Bugallo.
Neste contexto, Besteiro advertiu que “todos” deben cumprir “as normas” internas do partido que xorden de congresos como o que se celebrará este fin de semana en Santiago. Estes eventos orgánicos son “importantes” para fixar os textos políticos e as obrigacións da militancia.
Ademais, son unhas normas que se dan “entre todos” e que “desde o primeiro militante ata o último”, sen que haxa “diferenzas”, deben respectar, “gústenlles máis ou menos”.
