O Partido Popular de Santiago pediu este luns á alcaldesa da cidade, Goretti Sanmartín, que manifeste unha condena pública e expresa ante o que consideran un ataque machista dirixido á conselleira de Política Social, a través dun cartel da CIG no que, segundo as concelleiras María Baleato, Olaya Otero e Nerea Barcia, se realiza unha caricatura sexista e despectiva da conselleira.
En rolda de prensa, as concelleiras populares criticaron o que consideran unha falta de coherencia no discurso feminista do BNG. Baleato afirmou: “É realmente triste que en pleno 2025 aínda sexa necesario esixir unha condena a quen se proclaman abandeiradas do feminismo ante un ataque machista”.
O cartel en cuestión, segundo as populares, desvía a atención da labor profesional da conselleira para centrarse en aspectos superficiais e ofensivos. “É inaceptable que nunha sociedade que aspira á igualdade se utilicen ataques machistas como ferramenta de crítica política a unha muller”, engadiu Baleato.
A concelleira Olaya Otero criticou o silencio do goberno local ante esta situación, afirmando que “o silencio non fai máis que respaldar actitudes machistas que deberían estar desterradas”. Pola súa banda, Nerea Barcia insistiu en que o feminismo debe ser un compromiso constante e non limitarse a datas sinaladas como o 8 de marzo ou o 25 de novembro.
As representantes do PP tamén cuestionaron se a alcaldesa priorizará a defensa das mulleres ou os intereses do seu partido. “Que vai facer a señora Sanmartín? Vai poñerse do lado dunha muller veciña da cidade ou vai seguir defendendo os ataques machistas da súa querida UPG?”, preguntouse Olaya Otero.
Ademais, as populares aproveitaron para reivindicar o seu apoio á conselleira de Política Social e lamentar que o BNG e o seu sindicato, a CIG, “non estean á altura do que requiren os seus cargos”.
Finalmente, o PP de Santiago fixo un chamamento á alcaldesa para que non perda a oportunidade de condenar publicamente o cartel machista e mostrar unha posición firme en defensa dos dereitos das mulleres.
