O presidente da Xunta, Alfonso Rueda, defendeu a idea de impartir a docencia do Grao en Medicina noutras cidades galegas ademais de en Santiago de Compostela, aínda que cre que a “centralización nunha facultade debe seguir así”. Preguntado sobre este asunto na súa comparecencia posterior á reunión semanal do Goberno galego, Rueda recalcou que é “unha proposta no seu inicio”, pero avalouna porque a Facultade de Medicina da capital “é a máis grande de España” e acolle cada ano a un “número importante de alumnos”.
Ademais, lembrou que hai desde hai anos un consenso entre as tres universidades galegas de que haxa “unha única facultade” en Santiago, pero que “funcionase coa necesaria extensión da actividade docente” por todo o territorio galego para aproveitar “o potencial dos magníficos profesionais” que traballan en diferentes centros saniarios. “Trátase de ter aos futuros médicos e médicas o mellor formados posible”, recalcou o presidente da Xunta, para insistir en que “ninguén” se debe sentir “agredido” pola proposta nin pensar que isto “vai a minorar a calidade” do grao.
