O alcalde de Ames, Blas García, remitiu unha carta ao conselleiro de Sanidade, Antonio Gómez Caamaño, para instalo a realizar unha visita ao centro de saúde de Bertamiráns. O obxectivo é que poida comprobar de primeira man as condicións nas que traballa o persoal sanitario e a atención que reciben os veciños de Ames e dos municipios da contorna. O rexedor considera prioritario establecer un plan de mellora e ampliación das instalacións e do servizo de atención primaria.
Na misiva, Blas García recorda que en outubro xa trasladou á Consellería os principais problemas do centro: listas de espera superiores aos dez días, insuficiencia de persoal médico e de enfermería, ausencia de responsable de coordinación, espazos reducidos e falta de accesibilidade. Ademais, denuncia que o mobiliario non cumpre a normativa de prevención de riscos e que o edificio, con case 40 anos de antigüedade, apenas recibiu investimentos desde a súa apertura.
Outra das preocupacións expostas é a situación do Punto de Atención Continuada (PAC), que enfronta problemas similares ao centro de saúde e carece de espazos adecuados para o persoal. O alcalde tamén denuncia que a recente derivación dos pacientes pediátricos de Negreira a Bertamiráns provocou un colapso no servizo de pediatría, que xa contaba con prazas sen cubrir.
García subliña que tanto o conselleiro como o xerente da Área Sanitaria, Ángel Facio, estaban informados desta situación e comprometeron unha visita ao centro. Porén, segundo afirma, a visita foi anulada en varias ocasións sen nova data prevista. “É inadmisible esta deixadez e abandono das funcións nun centro que atende a 18.000 usuarios, con instalacións obsoletas e deficiencias estruturais notorias”, expresou o alcalde.
Por derradeiro, o Concello de Ames reitera a súa disposición a ceder terreos anexos para a ampliación do centro de saúde. Segundo afirma Blas García, a Consellería descartou ata o de agora esta opción, malia ser unha solución urxente e necesaria para garantir unha atención sanitaria adecuada.
