A manifestación convocada pola plataforma Queremos Galego este domingo, 23 de febreiro, baixo o lema ‘Lingua Vital Xa!’, e que ten como obxectivo “frear a emerxencia lingüística”, concluirá na Praza do Obradoiro cunha actuación de Mondra. Este xoves, unha vintena de entidades adscritas á plataforma presentaron en rolda de prensa o itinerario da protesta, ademais de lembrar as reivindicacións principais. A coordinadora de Queremos Galego, Celia Armas, explicou que a marcha sairá ás 12.00 horas da Alameda compostelá e concluirá no Obradoiro tras pasar pola Rúa da Senra, Praza Galicia, Porta da Mámoa, Toural, Rúa do Vilar, Praza de Praterías e Fonseca. Así mesmo, detallou que estará encabeza por “persoas referentes” do ámbito cultural, colectivos de mocidade, audiovisual, artes escénicas ou musicais, entre outras organizacións presentes en Queremos Galego.
Xa no Obradoiro, o acto estará conducido por Xurxo Souto, haberá unha intervención do presidente da Mesa, Marcos Maceira, e unha actuación de ‘Os Carapaus’, para o que convidan a todos os participantes a acompañar a marcha con percusión e animación para facer desta xornada “unha festa” pola lingua galega, antes de concluír a protesta coa actuación de Mondra. Para a manifestación, Armas confirmou que xa están previstos case unha trintena de autobuses desde diferentes localidades de toda a Comunidade. Neste sentido, apuntou que se constituíron 24 plenarios nos que se realizaron acordos para mobilizar á cidadanía e que quedaron fixados para promocionar as actividades de Queremos Galego. Ademais, a portavoz anunciou que está prevista a asistencia de delegacións de Cataluña, País Vasco e da Rede Europea polas Linguas, que se suman a “compartir as reivindicacións”.
DENUNCIAN VETOS DA XUNTA
Pola súa banda, Marcos Maceira destacou que esta manifestación se produce despois de “desenmascarar” o “pacto polo enterro do galego” da administración autonómica. Así, lembrou que na manifestación celebrada o 17 de novembro reclamábase un “proceso transparente, plural e con vontade do Plan xeral de normalización”, concretando “accións inmediatas que debía tomar o Goberno galego”. “Atopámonos con opacidade, unilateralidade e veto a participación de calquera das entidades dos diferentes sectores implicados no plan xeral”, lamentou antes de censurar o “veto” á Asociación de Escritores en Lingua Galega, das Anpas e entidades de sectores “absolutamente necesarios para impulsar a normalización da lingua”.
“É incrible que o Goberno galego pense en falar da educación sen contar con Anpas, sindicatos e organizacións estudantís; é incrible que se pense en falar do galego sen contar coas organizacións sindicais ou organizacións de consumidores. Tamén que a Xunta pretenda falar do desenvolvemento da cultura galega sen contar coas entidades do sector audiovisual ou a asociación de escritores en lingua galega; ou da administración sen contar co persoal técnico de normalización”, expuxo.
Fronte a isto, Maceira reivindicou que o 23 de febreiro sairán á rúa con “entidades sociais, amplas e diferentes sectores, así como organizacións políticas e sindicais”. En definitiva, unha representación “moi elevada da sociedade galega e da vontade colectiva” por “manter e recuperar a súa lingua”. Por todo iso, mostrou a súa confianza en que a sociedade “se está activando a favor da lingua”, algo que, ao seu xuízo, “será o que consiga empezar a reverter o proceso da lingua galega de substitución lingüística” para, “máis pronto que tarde, cambiar realmente a actitude do Goberno galego”. “Fai falta que a sociedade se implique e que o goberno acompañe as reivindicacións da sociedade. Se estas dúas cousas se producen, a situación do galego vai mellorar”, subliñou.
