Os catro concelleiros do Grupo Municipal Socialista no Concello de Santiago expulsados do Partido Socialista avanzaron que manterán a acta o que resta de mandato e que acudirán á xustiza para defenderse se o partido non atende as súas alegacións. Así o avanzaron Gonzalo Muíños, Mila Castro, Mercedes Rosón e Marta Álvarez nunha rolda de prensa ofrecida este mércores no Pazo de Raxoi despois de que na xornada do martes se coñecese que a dirección federal do partido ratificou a súa expulsión da formación.
Na súa comparecencia, os catro edís subliñaron que en todo momento actuaron con lealdade e compromiso á cidade de Santiago e aos seus electores e denunciaron que o único motivo de todo o conflito que estalou no pleno do pasado 24 de xuño é que un concelleiro presentase a súa dimisión para “facer sitio” ao secretario local, Aitor Bouza. “Tentaron retirarnos do debate público con presións constantes para que algunha de nós entregase a acta desde o minuto un despois das eleccións”, manifestou Mila Castro.
Ademais, Mila Castro, Mercedes Rosón e Marta Álvarez deixaron claro que no seu proceder “non existiu ningún incumprimento de ningunha normativa nin resolución” tendo en conta que o único que fixeron foi non asistir a unha reunión para designar ao novo portavoz que consideraban “nula”, tendo en conta que o que consideran que aínda é portavoz do Grupo, Gonzalo Muíños, aínda non esgotara o prazo para defenderse e presentar as súas alegacións e a súa suspensión de militancia non era definitiva.
