Decenas de persoas concentráronse este luns ante a sede da Xunta en Santiago para reclamar un sistema público de atención á dependencia e esixir a firma dun pacto político. Así, rexeitaron a “modificación unilateral” da Lei de servizos sociais e esixiron “unha mellor atención” ás persoas maiores e con dependencia. A protesta, convocada por Comisiones Obreras (CC.OO), o Colexio oficial de Traballo Social (COTS) e o Sindicato Labrego Galego-Comisións Labregas (SLG-CCLL), comezou ás 11.00 horas fronte ao complexo administrativo de San Caetano e contou co apoio de diferentes representantes políticos.
En concreto, contou coa viceportavoz parlamentaria do BNG, Olalla Rodil, o secretario xeral do PSdeG, José Ramón Gómez Besteiro, a coordinadora nacional de Podemos Galicia, Isabel Faraldo, e a concelleira de Dereitos e Servizo Sociais no Concello de Compostela. Entre cánticos como ‘Máis recursos e menos anuncios’, ‘Aquí está, aquí se ve, o traballo social en pé’, ‘O público é servizo, o privado beneficio’ ou ‘Fabiola dimisión’, sindicatos, traballadoras sociais e usuarios denunciaron que a modificación, introducida a través da Lei de acompañamento dos orzamentos autonómicos, supón un “grave retroceso” porque “converte os servizos sociais nun trámite administrativo e favorece a privatización”.
ESIXEN UN PACTO POLÍTICO
Neste sentido, a presidenta do COTS, Miriam Rodríguez Sierra, explicou que o que reivindican con esta mobilización é que se modifiquen as estruturas de dependencia e “que se teña en conta aos profesionais”. Entre os cambios “máis polémicos”, incidiu na unificación das solicitudes de dependencia e de discapacidade, “eliminando así a valoración profesional”. Pola súa banda, a secretaria xeral de CC.OO. Galicia, Amelia Pérez, detallou en declaracións ante os medios que a Xunta asinou un plan de choque co Goberno central para “reforzar o sistema”, pero lamentou que o Executivo galego “recortou os fondos no canto de aumentalos”.
Así mesmo, Pérez afeou á Xunta que “culpe” ao persoal público dos “atrasos” no sistema e advertiu de que “é necesario crear emprego estrutural no canto de reforzos temporais”. Outra das cuestións que preocupa aos sindicatos é “a promoción de políticas de bonos en lugar de ampliar prazas públicas en residencias e centros de día”. Por todo o anterior, esixiron a “renovación inmediata” dos cambios aprobados en materia de dependencia, a firma dun pacto político en defensa do sistema público de servizos sociais, a convocatoria “urxente” do Consello Galego de Benestar Social, coa comparecencia da conselleira de Política Social, Fabiola García, o incremento do persoal de valoración de dependencia e discapacidade e a mellora dos recursos públicos “para garantir unha atención digna”.
VOCES POLÍTICAS
Pola súa banda, a nacionalista Olalla Rodil reclamou á Xunta que dote de recursos humanos suficientes, que duplique o persoal dos equipos de valoración e orientación da dependencia e que elabore “inmediatamente” un plan de ampliación dos servizos de atención á dependencia de residencias públicas, de centros de día, do servizo de axuda no fogar. “Levamos moito tempo denunciando a situación na que se atopan por falta de recursos e de persoal, especialmente nos equipos de valoración e orientación que atenta directamente contra os dereitos fundamentais das galegas e dos galegos dependentes”, esgrimiu Rodil ante os medios.
Do mesmo xeito, o líder do PSdeG, José Ramón Gómez Besteiro, criticou que a “única” resposta da Xunta a estes “atrasos inasumibles” na resolución de expedientes da dependencia, sexa “pór en risco a calidade na atención” a través dunha modificación lexislativa que permite que funcionarios sen titulación en Traballo Social “tramiten e informen as solicitudes”. Así, o responsable socialista sinalou que “defender os servizos sociais é defender os dereitos das persoas máis vulnerables” e trasladou o apoio dos socialistas galegos aos traballadores sociais que ven como a súa profesión está a ser menosprezada”.
Ademais, a coordinadora nacional de Podemos Galicia, Isabel Faraldo, advertiu de que “as modificacións en materia de atención á dependencia que Alfonso Rueda tenta camuflar na Lei de Medidas Fiscais e Administrativas, que acompaña aos orzamentos da Xunta, supoñen un grave retroceso na calidade da atención ao eliminar o informe social”. Con todo, a concelleira de Servizos Sociais do Concello compostelán, María Rozas, denunciou o “desmantelamento” por parte da Xunta do sistema público de atención á dependencia e fixo fincapé en que o obxectivo trasladar este servizo ao ámbito familiar e ao ámbito privado.
