O líder do PP de Santiago, Borja Verea, urxiu este venres que “se desmantele o maior centro comercial de drogas de Santiago, que se atopa no barrio de Santa Marta”. Verea, que mantivo unha reunión con veciños desta zona, advertiu que se trata dunha cuestión de carácter “político” e “non só policial, como pretenden facer ver os nacionalistas”. Neste sentido, lamentou que “a alianza tripartita de CA, BNG e PSOE non recoñeza o problema” ao entender que implica que non sitúa entre as súas “prioridades” buscar “solucións”.
“No ano 2004 había en Santiago 175 policías locais, no ano 2024, hai 121. Evidentemente, estamos ante o mellor retrato da ineficacia baixo a que vive este goberno de tres, e as consecuencias estamos a lamentalas hoxe en día”, argumentou, antes de recalcar que se el fose rexedor priorizaría unha Policía Local “máis reforzada”. Tamén criticou que o goberno local “non apoie” á Policía “cando o necesita” e exemplificou con varias actuacións, antes de incidir en que o incremento da sensación de inseguridade é “unha realidade na cidade”.
O tamén deputado autonómico subliñou que os nacionalistas “apostan por seguir pechando os ollos”. “E nós dicimos que non poden seguir así ante este incremento de inseguridade. Que está a pasar en toda Europa? Si. Que está a pasar en toda España? Si. Que está a pasar en toda Galicia? Si. Que está a pasar en Santiago? Si. Pero haberá que tomar medidas e non estar a dicir que non hai un problema na nosa cidade”, advertiu.
VE “CLARA” A SOLUCIÓN EN SANTA MARTA
Para o popular, concretamente, en Santa Marta, está “clara” a solución, “e fai falta vontade política”, algo do que considera que “carece” o goberno que dirixe Goretti Sanmartín. Así, defendeu que é preciso “reforzar a presenza policial, a limpeza e a hixiene, pensando, sobre todo, nos nenos que ven cada día xiringas tiradas nos parques onde van xogar”. “E despois tampouco hai que enganar á xente, o problema non se vai a solucionar se non se desmantela o centro comercial de droga que existe alí en Santa Marta, no Banco do Pobre”, aseverou. “Tampouco podemos obviar o que sofren os usuarios do Clínico, cos consumidores, que dormen no aparcadoiro e pícanse na contorna, increpando aos enfermos e usuarios que chegan, cando non lles dan diñeiro”, resolveu.
