Hoxe conversamos con Sabela Hermida, actriz e bailarina nada en Vigo pero con moita “ourensanía”, que se atopa agora mesmo de xira por Galicia coa obra Guerra, de Teatro do Noroeste, despois da súa recente estrea no Teatro Principal de Santiago de Compostela.
Falaremos con ela dos seus proxectos teatrais e cinematográficos para este 2025, dos seus referentes, das cousas que máis lle gustan… En definitiva, poderemos coñecela un pouco mellor, no persoal e no profesional, grazas a este “que levo na chistera”.
Sabela, cóntanos un pouco desta nova obra de teatro, ‘Guerra’. Como foi a estrea?
Pois Guerra é unha obra de Teatro do Noroeste, escrita e dirixida por Eduardo Alonso. Acabamos de estrear no Teatro Principal de Santiago de Compostela, coa felicidade de ver o teatro cheo durante os dous días de funcións. Agora acabamos de comezar a xira, en Ribadeo, temos as próximas función na Coruña e Narón, e así iremos percorrendo moitas plazas de Galicia nos próximos meses.
A verdade que está sendo unha experiencia moi satisfactoria, da man duns compañeiros e un equipo de luxo. É unha obra de gran formato, moi potente e que fala das miserias da Guerra, a partires de 6 actrices e actores: Luma Gómez, Miguel Pernas, Maxo Barjas, Manuela Varela, Xavier Estéves e servidora, que encarnamos personaxes universais do teatro clásico e moderno, dentro dun teatro derruído e sitiado. Contamos coa marabillosa escenografía e vestiario de Carlos Alonso e coa sensibilidade na composición musical de Bernardo Martínez.
E para 2025 algún proxecto máis que poidas adiantarnos?
Pois a verdade que vou ter un 2025 bastante intenso! Aparte deste e doutros proxectos escénicos, no ámbito cinematográfico, está pendente de estrea unha longametraxe, Entelequias, escrito e dirixido por Darío Autrán, que é a versión cinematográfica da obra de teatro que estrearamos en 2020 baixo a dirección de Xosé Leis, un texto moi potente, co propio Darío, Nerea Brey e máis eu en escena e agora tamén no set!
Tamén se vai estrear unha curtamentraxe moi especial de Gon Caride Un Novo Día, baseada nun relato de Rosalía Fernandez Rial, na que tiven a sorte de participar. Acabamos de recibir a estupenda noticia, ademais, de que forma parte do catálogo Short From Galicia, da Axencia Galega das Industrias Culturais.
E polo demais pois tamén seguirei coa danza, bailando e dando cursos diversos, coas presentacións de eventos e galas e o que vaia surxindo!
