Os investigadores da Universidade de Santiago de Compostela, Miguel Taín e Patricia Fra, presentaron este mércores a publicación do libro Xeorxiana Goddard King e The Way of Saint James (1920). A primeira peregrinación erudita polo Camiño de Santiago, editado por AKAL. A obra analiza a visita da profesora estadounidense Xeorxiana Goddard King a Santiago en 1915, coincidindo co Ano Santo Compostelán, e a súa contribución ao estudo do patrimonio e das peregrinacións.
O libro é resultado dunha investigación de tres anos, realizada entre setembro de 2021 e agosto de 2024, coa colaboración da Cátedra Institucional do Camiño de Santiago e das Peregrinacións. A través de oito traballos de investigación, o volume afonda na relevancia desta historiadora da arte e primeira ‘peregrina erudita’, que foi profesora no Bryn Mawr College e colaboradora de Archer Milton Huntington na Hispanic Society.
A obra conta coa participación de expertos de diversas universidades, como Patricia Fra, Miguel Taín, Mar Llinares e Xosé Santos (USC), George Greenia (Universidade William & Mary), Paula Pita Galán (Universidade de Granada), Francisco J. Novo Sánchez (Universidade de Málaga) e Manuel F. Rodríguez (Xacobeo).
O libro aborda a figura da autora desde múltiples perspectivas. George Greenia contextualiza a súa contribución ao hispanismo norteamericano e analiza o seu traballo desde unha perspectiva de xénero, vinculándoa á literatura de viaxes feminista.
Paula Pita Galán examina a súa traxectoria como profesora de Historia da Arte, mentres que Patricia Fra detalla os preparativos da súa viaxe a Santiago, apoiándose en documentos do arquivo histórico da Hispanic Society of America.
A exploración do patrimonio histórico-artístico aparece no capítulo de Francisco Javier Novo, quen analiza os lugares visitados pola investigadora, estendendo a súa ruta cara ao Atlántico, con paradas en Muxía, Fisterra, Noia e Padrón. Pola súa banda, Miguel Taín estuda a súa estancia en Compostela durante o Ano Santo de 1915, poñendo especial atención á súa visión da Catedral e das celebracións do Apóstolo.
Outro dos aspectos destacados da obra é a análise de milagres, lendas e tradicións vinculadas ao Camiño, realizada por Manuel Rodríguez Fernández. Tamén se inclúe un estudo sobre os ‘tipos populares’ descritos por King, coa súa interpretación dos sacerdotes e das mulleres galegas, realizado por Mar Llinares.
Finalmente, Xosé Santos Solla achega unha perspectiva xeográfica, analizando o impacto da obra de Goddard King no fenómeno do turismo e na transformación da paisaxe do Camiño de Santiago.
Con esta publicación, os investigadores da USC poñen en valor a figura dunha das primeiras estudosas do patrimonio e das peregrinacións xacobeas, achegando unha nova visión sobre a historia e a evolución do Camiño de Santiago no século XX.
