CIG-Correos organizou este mércores unha concentración ante a sede da área noroeste de Correos en Santiago (situada na compostelá Rúa do Franco) en defensa dun servizo postal universal “prestado desde o público e unhas condicións laborais e retributivas dignas”. A protesta, segundo trasladou, realízase en resposta ás medidas contempladas no decreto ónmibus que non recibiu luz verde na Cámara baixa e que supoñen, considera, “un recorte de servizos á cidadanía e unha precarización das condicións de traballo do persoal de Correos”. Aínda que este real decreto non foi convalidado, a CIG-Correos non dubida que a parte referida á ampliación do Servizo Postal Universal volverá en breve ao Congreso, “coa mesma redacción, para a súa aprobación definitiva”.
O secretario de Organización deste sector na CIG, Anxo Álvarez, explicou que, a diferenza do ano 2010, cando a empresa Correos foi designada polo Goberno de José Luís Rodríguez Zapatero como fornecedora do Servizo Postal Universal (SPU) a través dun contrato programa de 15 anos (2010-2025), neste real decreto “só se reflicte unha ampliación de cinco anos, ata 2030”. “Desde a CIG preguntámonos con preocupación o porqué deste prazo tan curto, tendo en conta, ademais, que o real decreto condiciona a Correos á aprobación dun plan de persoas que suporá unha serie de recortes en persoal e unha desregulación funcional, laboral e retributiva dos traballadores e traballadoras”, advirte.
