A concelleira do PSOE de Santiago Mila Castro instou ao Goberno local a establecer un maior control á concesionaria de limpeza viaria para “evitar a presenza de xiringas” en zonas do barrio de Santa Marta.
Nunha nota de prensa, a edil explicou que o novo contrato de limpeza viaria e recollida de residuos urbanos inclúe “a obrigación da empresa a recoller xiringas e agullas hipodérmicas que se atopen en espazos públicos” de maneira “inmediata”.
Segundo Mila Castro, o prego tamén inclúe que a empresa “debe efectuar unha revisión diaria dos puntos con presenza habitual deste tipo de residuos no termo municipal e está obrigada a recollelos e a xestionalos”.
Nesta liña, demandou ao Executivo local que active “os mecanismos necesarios” para que a empresa responsable do servizo “incremente a súa presenza e control na zona para evitar riscos de nenas e nenos que se poidan magoar con esas xiringas” que, segundo destacou, “están a aparecer de maneira reiterada”.
Algúns destes residuos, apuntou, chegaron a atoparse dentro do propio parque infantil situado á beira do Centro Sociocultural.
“De novo, propomos solucións e instamos o Goberno local a actuar”, insistiu Castro, que tamén reiterou a demanda dunha convocatoria da xunta local de seguridade para “atallar de maneira conxunta” coa Subdelegación unha situación que, engadiu, xera “inquietude” entre os veciños do barrio.
