Unha vintena de persoas manifestáronse este domingo en Santiago para clamar contra a caza, esixir a súa abolición, denunciar a situación de “desprotección” que sofren os cans usados para esta actividade e reivindicar os seus “dereitos”.
Convocados pola Plataforma NAC (Non Á Caza), os manifestantes partiron desde a Praza de San Martiño ao redor das 12,00 horas e terminaron o seu percorrido na compostelá Praza do 8 de marzo, onde se leu un manifesto en rexeitamento á situación “que viven actualmente as animais vítimas da caza”.
“Estamos aquí para pelexar contra a caza, un dos nosos obxectivos finais é a súa abolición, en todas as modalidades, porque somos unha organización antiespecista e a caza parécenos un sen sentido que non ten cabida na sociedade actual”, explicou a Europa Press Cristina López, coordinadora da plataforma en Santiago.
Deste xeito, destacou que a Plataforma NAC (Non Á Caza) é unha asociación sen ánimo de lucro, antiespecista e apartidista, que loita contra a caza en todas as súas modalidades e rexeita calquera tipo de malos tratos animais. Ten como obxectivo inmediato acabar coa caza con cans e como obxectivo a longo prazo conseguir a abolición da caza.
“Como pode divertir ver a un animal sufrir”; “A tortura non é cultura”; “Non é deporte, é asasinato”; “Ningún animal é para cazar”; “Este lecer é un negocio”; “Son cans de casa, non son cans de caza”, son algúns dos cánticos que corearon os manifestantes polas rúas compostelás este domingo.
Ademais, a plataforma lembrou que esta é unha cita anual que leva 15 anos realizándose de forma continuada, coincidindo co fin da tempada de caza, e que conta con apoio en máis de 40 cidades de España e en máis de 30 europeas. No caso de Galicia, este domingo tamén se celebrou unha manifestación en Vigo e outra na Coruña.
Neste contexto, a NAC denunciou que “miles de cans utilizados para a caza en España enfrontan un destino devastador: malos tratos, abandono e, en moitos casos, a morte. As súas vidas son reducidas a un simple instrumento desechable cando xa non son útiles”.
Con todo, a coordinadora da plataforma en Compostela lembrou que precisamente agora, co fin da tempada de caza, é cando “abandonan e mesmo matan a moitos destes cans, unhas imaxes horribles que se repiten todos os anos”. Así mesmo a NAC lamentou a “exclusión” dos cans utilizados para cazar da Lei Estatal de Benestar Animal e denunciou así a súa “desprotección”.
