A competición deportiva ‘Os 10.000 peregrinos‘, prevista para o 6 de abril nas rúas de Santiago de Compostela, xa acadou o fito de superar as 1.000 inscricións. Os interesados en formar parte desta carreira teñen ata o vindeiro mércores, 3 de abril, para formalizar a súa participación.
A proba contará coa presenza de figuras destacadas do atletismo, como Carlos Maio, recoñecido polos seus títulos de campión de Europa Sub-23 e de España nos 10.000 metros, ademais de ser o actual récord de España na media maratón. Tamén se destaca a presenza de atletas internacionais como o burundés Rodrigue Kwizera, quen se alzou co triunfo no Cros Country Tour da tempada 21-22; Abdessamad Oukhelfen, medallista de bronce nos 5.000 metros no Europeo Sub-23 de 2019; Nicolás Custas, atleta uruguaio campión suramericano de medio maratón no mesmo ano; e Eric Kimutai, gañador no Maratón de Maspalomas 2022 e na Milla de Granollers 2024.
Na competición feminina, sobresaen figuras como Ester Navarrete, a actual campioa de España de maratón con vistas a participar nos próximos Xogos Olímpicos de París, e Alice Finot, de orixe francesa e residente en Galicia, quen se colocou quinta no Mundial na especialidade dos 3.000 metros obstáculos.
Así mesmo, competirán atletas da talla de Rita Jeptoo Busienei, tres veces gañadora do Maratón de Boston e vencedora en Chicago, Estocolmo e Milán; a campioa suramericana Sub-23 Katherine Tisalema e a corredora marroquí Himi Lamyae. A cidade de Santiago prepárase así para acoller a unha destacada nómina de atletas que converterán a carreira do 6 de abril nun evento de seguimento obrigado para os afeccionados ao atletismo.
