A pasada noite comezou a primeira de catro noites de presentación de ‘Barullo’ o último disco de Baiuca. Este produtor e músico é coñecido pola súa mestura de ritmos electrónicos e tradicionais, sendo un dos grandes referentes internacionais da nosa cultura. Non só conquistou medio Europa tocando en lugares como Suíza, Francia e Reino Unido entre outros; se non que tamén levou a música en galego a outros continentes tocando en países como Sudán, Marrocos, México, Colombia, etc.
Nos seus concertos ademais de xogar cos sintetizadores, creando ritmos máis frenéticos, mostra o seu talento como músico tocando instrumentos como a frauta ou as cunchas.
É de destacar a calidade e variedade de colaboracións que este artista agrupa nas súas composicións, colaboracións que non só se quedan entre as paredes dun estudo, se non que leva consigo a cantar e tocar en directo. Desta forma ao longo do seu show son habituais as aparicións dalgúns dos artistas máis recoñecidos do panorama galego.
Exemplos disto son as aparicións da pasada noite; Alejandra e Andrea Montero compoñentes de grupos como Aliboria ou Lilaina, así como Xosé Lois Romero, quenes xa levan anos acompañando a Baiuca polos escenarios. Antía Muíño, cantante e música, é outro destes exemplos, así como Felisa Segade que xa colaborara anteriormente como integrante do grupo Leilía, facéndoo agora en solitario nas pezas “Navajitas” e a canción homónima “Barullo”. Antía Ameixeiras, cantante e violinista dos grupos Caamaño e Ameixeiras ou Maricarme, uniuse a este último proxecto con tres colaboracións: Sementei, Xoia e Sísamo. Outro nome que se suma a este disco e que se subiu ao palco a acompañar a Baiuca é Xurxo Fernandes, coas cancións Navajitas e PAEQB.
